Kryeministri Edi Rama ka reaguar lidhur me ndërhyrjen e dhunshme të policisë së Vlorës ndaj adminisratorëve dhe stafeve të disa lokaleve, që mbrëmjen e djeshme zhvilluan një formë të veçantë proteste, duke kundërshtuar vendimin që mbyllte muzikën në orën 22:00.
“Të gjithë ata që duan të kërcejnë dhe të këndojnë gjatë natës mund të organizohen në natyrë dhe pika të tjera ku nuk i shqetëson njeri”, shkruan Rama, ndërsa bizneset kërkojnë ndryshim të orës policore dhe zgjatje të fashës orare për lejimin e muzikës.
Rama shprehet se në Lungomare nuk ka muzikë por ndotje akustike të tmerrshme, duke shtuar se e drejta e atyre që duan zhurmë muzikore nuk mund të fitojë mbi pjesën tjetër që duan zhurmën e detit.
“Protestë në Lungomare për muzikën?
1.Lungomare s’ka muzikë po ndotje akustike të tmerrshme ku përzihen dhjetra linja burime menjëherë
2.E drejta e atyre që duan zhurmë muzikore tërë natën nuk fiton dot mbi tē drejtën e atyre që natën duan zhurmën e detit
3.Siç është lajmëruar, nga data 20 korrik muzika do të ndalet në 23.00 në çdo zonë turistike të banuar dhe kush do të kërcejë e të këndojë tërë natën po të dojë, le të organizohet në natyrë, në pika ku nuk shqetëson njeri – si në tërë botën e civilizuar turistike”, shkruan Rama.
Në protestën e djeshme në Vlorë, bizneset kanë vendosur Himnin e Flamurit njëherazi me volum shumë të lartë në orën 21:45, vetëm 15 minuta para mbylljes së muzikës.
Me anë të kësaj proteste ata kërkojnë zgjatjen e orarit policor, për shkak se po hasin shumë vështirësi nga pandemia.
