Nga Boldnews.al
Struktura shtetërore, me në krye Policinë e Shtetit, janë angazhuar këto ditë të nxehta vere për të prishur kioskat e llamarinës në bregdet, në aksionin e shpallur nga kryeministri Edi Rama “për të mbrojtur territorin”.
Por, ndërkohë që e gjithë vëmendja është përqëndruar në goditjen e paligjshmërive të vogla, askush nga autoritetet nuk ka sy për të parë shkatërrimet në zonat urbane të Tiranës.
Një video e siguruar nga portali “dosja.al” tregon se si punimet për ndërtimin e një pallati në zonën e “Ali Demit”, kanë shkatërruar në mënyrë skandaloze rrugën kryesore, duke rrezikuar jetën e banorëve që qarkullojnë si këmbësorë apo në drejtimin e mjeteve.
Nga ajo që ka mësuar “Boldnews.al”, ndërtimi po kryhet nga “2T” shpk, aksioner kryesor i së cilës është Artan Sako, vëllai i Komandatit të Gardës së Republikës, Gramoz Sako.
Në aktivitetin e saj ndërtues, ajo ka siguruar leje ndërtimi për ngritjen e një godine edhe në zonën e njohur të “Ali Demit”.
Por, punimet e saj kanë cënuar rëndë rrugën kryesore automobilistike.
Pamjet në video tregojnë se pjesa anësore e rrugës tashmë është shkëputuar nga trualli mbajtës, i cili është gërmuar për të hapur gropën e themelit.
Po ashtu, rruga është plasaritur dhe dëmet e konstatuara do të jenë shumë të vështira për t’u sistemuar.
Pavarësisht situatës së vështirë, askush nga institucionet shtetërore, përfshirë Policinë e Shtetit dhe Inspektoratin e Mbrojtjes së Territorit të Bashkisë së Tiranës, nuk e ka evidentuar situatën.
Të paktën, nuk kanë ndërmarrë asnjë masë për bllokimin e punimeve dhe kjo dallohet qartë në video nga punimet e mjeteve të rënda.
Shoqëria “2T” shpk, e cila po kryen punimet në atë vend, është një ndër përfitueset kryesore të tënderave publikë, të zhvilluar nga autoritetet shtetërore, përfshirë edhe Bashkinë e Tiranës.
Të dhënat e publikuara nga baza e të dhënave “spendingdata.al” tregojnë se kompania private ka përfituar më shumë se 18 miliardë lekë të vjetra nga fondet publike, përgjatë periudhës 2019-2021.
Thuhet se një pjesë të këtyre parave, shoqëria “2T” i përdor për sponsorizuar pseudo-gazetarë, të cilët rrihen rrugëve për shkak të abuzimit me hapësirën mediatike e publike.
