Gjykata e Posaçme ka kaluar për gjykim dosjen ndaj Ardian Çapjes, Klajdi Dokolit, Etjen Canit dhe Jorgo Lekut për akuzën e vrasjes së dyfishtë në Elbasan në 15 gusht 2012, të Gentian e Nezir Beqirit. Gjithashtu, gjykata ndau dosjen për dy të pandehurit e tjerë, Florenc Capja dhe Ervis Bardhi për shkak se janë në mungesë të autoriteteve gjyqësore – njëri i arrestuar në Emiratet e Bashkuara Arabe dhe tjetri në Greqi.
Kjo dosje fillimisht u hetua nga prokuroria e Elbasanit, më pas i kaloi SPAK, pasi u ngrit akuza e grupit kriminal. Ardian Çapja së bashku me nipin e tij akuzohen se urdhëruan vrasjen e babë e bir: Gentjan dhe Beqir Nezirit. Së bashku me ta, të pandehur janë marrë Ervis Bardhi, Etien Cani, Olsi alias Jorgo Leku dhe Klajdi Dokoli. Akuzat kundër të pandehurave, janë “Vrasje në rrethana cilësuese” kundër dy personave, “Mbajtjes pa lejë të armëve të zjarit”, “Grup i strukturuar” kriminal dhe Kryerja e veprave penale në formën e “Grupit të Strukturuar kriminal”.
Vrasja e Gentian dhe Nezir Beqirit, dyshohet se është urdhëruar nga Çapjat për hakmarrje, pasi Gentiani, dyshohej se ishte një nga tre autorët që ekzekutoi me automatik në dhjetor 2005, Sokol Çapjan, vëllain e Ardjan Çapjas.
Florenc Çapja dhe Ardjan Çapja, në vitin 2012 pretenduan se nuk kishin lidhje me krimin, pasi ditën e ngjarjes ndodheshin në Maqedoni dhe jo në Elbasan. Por 8 vite më vonë, njëri nga vrasësit me pagesë Ervis Bardhi, u zbulua nga një gjurmë gishti. Ai mori statusin e të penduarit dhe bashkëpunoi me prokurorinë.
Bardhi tregoi se së bashku me Jorgo Lekun ishte paguar nga Ardjan e Florenc Çapja 50 mijë euro, në këmbim të vrasjes së Gentian Beqirit. Bardhi, ka rrëfyer se Gentianin e ka ekzekutuar me 4 plumba në kokë, ndërsa babain e tij, Nezir Beqirin, e mbyti me jastëk Olsi Leku.
