Ish-Kryeministri Sali Berisha ka bërë të ditur sot detaje për historinë e një të moshuare, ndaj të cilës një ditë më parë policët e Erion Veliajt ushtruan dhunë, dhe i hodhën në mes të rrugës disa qese me perime, që e moshuara tentonte ti shiste për të siguruar të ardhura.
“Me lutjen time, miq, lexojeni këtë mesazh për nënën, së cilës banditë me uniformë të Lal Plehut, në videon më poshtë, i hedhin frutat dhe domatet në rrugë”, shkruan Berisha në rrjetin sociale, duke postuar edhe mesazhin e mëposhtëm.
Qytetarja shkruan: “Përshëndetje! Këtë nënën e rastisa gati para 1 muaji, ulur në 40 gradë, po hante bukë thatë, ndërkohë që priste të shiste produktet që kishte dheu me duart e saj. Pasi bleva nja dy gjëra e pyeta përse në këtë moshë ende punonte në rrugë, në pluhur, në super-vapë që herë pas here ndërronte drejtim sipas diellti që lëvizte.
Më nxori direkt fotografinë e djalit të saj që kishte vdekur e me lot në sy më tha: Ah, moj bijë, mua më ka ikur ky djalë dhe ngela pa sy e pa bukë! Tani që e pashë lajmin tek ju, m’u këput shpirti! “
Brenda një ore, mijëra qytetarë e lexuan mesazhin e mësipërm dhe qindra komente vërshuan në postim, plot indinjatë dhe revoltë për arrogancën e pushtetit ndaj mjerimit dhe varfërisë.
Ndër të gjithë ata, një zë tingëlloi më i dhimbsur: “JOQ, na ndihmo me hapjen e një llogarie për këtë gjyshe, ta ndihmojmë të gjithë shqiptarët, me sa mundësi kanë e paratë e mbledhura t’ia dërgoni gjyshes, mos të dalë më në këtë vapë në trotuar e të torturohet nga policët e ndyrë.”
