Detajet/ Policia i sekuestron turkut 33 mijë dollarë në Rinas

Policia i ka sekuestruar një shtetasi turk 33 mijë dollarë të padeklaruara në Pikën e Kalimit Kufitar të aeroportit “Nënë Tereza”.

Sipas një njoftimi zyrtar, ndaj shtetasit 43-vjeçar turk ka nisur procedimi penal.

“Shërbimet e Policisë Kufitare në Rinas në bashkëpunim me shërbimet e Doganës Rinas dhe Antitrafikut në Drejtorinë e Përgjithshme të Doganave, në vijim të kontrolleve të imtësishme, në bazë të analizës së riskut, në hyrje të PKK Rinas, kanë kaluar në vijën e dytë, për kontroll më të detajuar të bagazheve, shtetasin turk N. P., 43 vjeç.

LEXO EDHE  Ndoti ujërat në terminalin e trageteve në Portin e Durrësit, procedohet penalisht kapiteni i tragetit

Si rezultat i kontrollit, shërbimet e Policisë Kufitare kanë gjetur të fshehura në çantën e laptopit, 33000 dollarë, të cilat ky shtetas nuk i kishte deklaruar.

Në vijim të veprimeve, shtetasi N. P., u procedua penalisht për veprën penale “Mosdeklarim në kufi i të hollave dhe i sendeve me vlerë”, si dhe u sekuestrua në cilësinë e provës materiale shuma e dollarëve.

Materialet i kaluan Prokurorisë së Rrethit Gjyqësor Tiranë, për veprime të mëtejshme”, thuhet në njoftimin e Policisë.