Të ëmës iu sekuestruan 100 mijë euro, kush është koka e grupit të drogës që vepronte në Greqi

Gjykata e Shkallës së Parë Fier ka miratuar kërkesën e Prokurorisë për vendosjen e sekuestros preventive mbi tre llogari bankare në vlerën totale 100.000 euro të depozituara pranë një banke të nivelit të dytë nga Lumturi Çervenaku. Kjo e fundit është e ëma e Rando Hodollarit (në foto), i dënuar në shtetin grek për veprat penale të trafikimit të lëndëve narkotike të kryer në kuadrin e një grupi kriminal ku ai ka patur rolin e drejtuesit të grupit.

Ky sekuestrim është kryer në kuadër të procedimit penal të regjistruar për veprën penale të “Pastrimi i produkteve të veprës penale apo veprimtarisë kriminale”.

LEXO EDHE  Polarizohet zhvillimi i rajoneve, varfërohet Veriu, “pasurohet” Tirana dhe qendra

Sekuestrimi i llogarive bankare është bazuar në të dhëna të arsyeshme që provojnë se këto pasuri burojnë nga të ardhura të fituara si pasojë e aktivitetit kriminal në fushën e narkotikëve të kryer në vazhdimësi nga 29-vjeçari Rando Hodollari në shtetin grek, njoftoi gjykata.

Rando Hodollari është arrestuar në Greqi në vitin 2018, ndërsa ai dyshohet se ka drejtuar një grup të trafikut të drogës që operonte kryesisht në Athinë, dhe përbëhej nga shqiptarë.