Posta Shqiptare prej vitesh ka ekskluzivitetin e shitjes së kuponave për Kartat e Identitetit dhe Pasaportat Biometrike. Por duket se ky shërbim ka nisur të çalojë dhe gjithçka bie në kurrizin e qytetarëve.
Një prej filialeve të Postës Shqiptare, në zonën e Kombinatit, ku si drejtuese është Irena Isufaj, nuk ka pasur kupona për pasaporta biometrike, ndërsa dhjetra qytetarë ose kanë pritur me orë të tëra për të marrë një përgjigje, ose janë detyruar të shkojnë në zyra të tjera postare.
Bazuar në një prej ankesave të një qytetari, prej orës 08:30, i është thënë nga punonjësit e postës se presin të marrin furnizime. Por edhe pas mbi 5 orësh, kuponat nuk kishin mbërritur në postë, a thua se ishin porositur në një shtet tjetër, dhe pritej të mbërrinte ngarkesa.
Kjo situatë e krijuar në këtë filial është shtrirë edhe në disa të tjerë jo vetëm në Tiranë, por edhe në rrethe.
Në kushtet kur në vend kthehen edhe disa qindra emigrantë, të cilët mund të kenë nevojë për të rinovuar Pasaportat Biometrike, Posta Shqiptare, si shpërndarësi i vetëm i kuponave duhej të kishte marrë masat për të siguruar sasitë e nevojsme, duke i ndihmuar qytetarët dhe jo duke i sorollatur ato.
Duket se kjo situatë nuk i intereson aspak edhe kreut të Postës Shqiptare, Laert Duraj, i cili në zgjedhjet e fundit kandidoi për deputet në Qarkun e Gjirokastrës, nën siglën e Rilindjes. Ndoshta Drejtorit Duraj nuk i kanë kaluar ende ethet e fushatës së fundit, ndërsa institucioni që drejton duket se është çorganizuar në një prej shërbimeve kryesore ndaj qytetarit.
