Prokuroria e Posaçme, SPAK, ka kërkuar 20 vite e 8 muaj burg për dy të pandehurit, Altin Myslihaka dhe Ardian Bega, të akuzuar për 137 kilogramë kokainë të kapur në shtator të 2019-s.
Për Altin Myslihakën u kërkua 18 vite burg, i cili përfitoi nga Gjykimi shkurtuar dhe shkon në 12 vite. Ndersa për Për Ardian Begën u kërkua 12 vite dhe si pasojë e gjykimit të shkurturar shkon në 8 vite e 8 muaj burg
Për këtë çështje vijon të jetë në kërkim Gentian Malindi, i dyshuar si porositësi i lëndës narkotike, për të cilin Gjykata veçoi dhe pezulloi për një vit çështjen.
Rreth 137 kilogram kokainë, drogë e klasit të parë dhe një nga më të kushtueshmet në treg, ishte fshehur në katër konteinerë të mbushur me banane që vinin nga Ekuadori drejt Shqipërisë.
Porositësit e drogës, të pikasur nga DEA amerikane, kishin shfrytëzuar itinerarin e importit të frutave ekzotike për të transportuar brenda konteinerëve edhe “dërgesën” e tyre.
Me autorizimin e DEA-s amerikane, kur konteinerët mbërritën në portin e Pireut në Greqi u krye edhe zëvendësimi i kokainës me oriz.
Kështu autoritetet ishin një hap para trafikantëve. Në Shqipëri diçka mesa duket nuk shkoi siç duhej, dhe personi i dyshuar si porositësi Gentian Malindi, arriti të arratisej pasi hapi një prej pakove dhe pa se aty nuk kishte kokainë por oriz.
