Shumica janë mësuar ta shohin me veshje tradicionale, por presidenti i Afganistanit, Ashraf Ghani, vendosi që të premten të bënte një ndryshim goxha të dukshëm, kur i shkoi mysafir në Shtëpinë e Bardhë homologut amerikan, Joe Biden.
Ndryshe nga rastet tjera, kur ai shihet me veshje tradicionale afgane, me mbulesë rreth kokës që gjithashtu ka një pjesë të zgjatur deri në bel e me këmishë pa kravatë, Ghani u pa para presidentit amerikan i veshur në mënyrë të ngjashme me të – kostum e kravatë.
Shefi i Shtëpisë së Bardhë e shfrytëzoi këtë takim për t’u bërë thirrje afganëve që të vendosin për të ardhmen e vendit të tyre në kohën kur trupat amerikane po tërhiqen pas 20 viteve luftë, ndërsa qeveria afgane po mundohet ta parandalojë avancimin e talibanëve, shkruan Reuters.
“Afganët do të duhet të vendosin për të ardhmen e tyre, çfarë dëshirojnë ata”, tha Biden, duke shtuar se dhuna e pakuptimtë duhet të ndalet.
Në anën tjetër, Ghani tha se forcat e sigurisë kanë rimarrë nën kontroll gjashtë distrikte të premten. Ai gjithashtu tha se e respekton vendimin e Bidenit dhe se bashkëpunimi mes dy vendeve po hyn në një fazë të re.
Presidenti afgan shtoi se vendimi i Shteteve të Bashkuara për t’i tërhequr trupat është vendim sovran dhe se është detyrë e Kabulit që t’i menaxhojë pasojat.
