Nga BoldNews.al
Gjykata Kushtetuese e Shqipërisë mori një vendim…, për të mos marrë vendim. Të gjithë prisnin që “elita” e gjyqësorit të “pavarur” shqiptar të shprehej në lidhje me çështjen e zgjedhjeve lokale (votimeve) të 30 qershorit 2019, por pas disa orësh konsultim, anëtarët e saj dolën me supet ngritur. Gjykata Kushtetuese ka pezulluar gjykimin për padinë e Voltana Ademit për zgjedhjet e 30 qershorit, e cila kërkonte ti shpallte të paligjshme dhe tashmë kushtetuesja jonë do i drejtohet Komisionit të Venecias për opinion dhe më pas do të marrë vendim.
Shumë kishin shpresë se me krijimin e Gjykatës Kushtetuese votimet e 30 qershorit 2019 do të konsideroheshin si të paligjshme dhe si pasojë mund të kishim zgjedhje të reja për pushtetin lokal, në vjeshtën e këtij viti. Por shtatë anëtarët e Gjykatës Kushtetuese janë të “lidhur nyje” në b… e rrapit të Partisë Socialiste. Nuk mund të vendosnin, duke konfirmuar edhe një herë se “pavarësia” e tyre nuk ekziston, pasi ka një litar që i tërheq nga godina karshi…
Sërish bëhemi gazi i botës, edhe pse kryeministri ynë bërtet me të madhe se BE na ka halë në sy dhe ne meritojmë integrimin, por “forcat e errëta” në Bruksel nuk duan të shohin arritjet tona. Jo më larg sesa sot edhe “superambasadorët” u shprehën gjoja kritik me drejtësinë e re, por drejtësia e re është e varur diku dhe litari është vetëm në duart e kryeministrit.
Do shkojë sërish problemi ynë në Komisionin e Vencias, ku ky institucion ekziston vetëm për shkak të Shqipërisë. Komisioni Europian për Demokraci Nëpërmjet Ligjit, i njohur si Komisioni i Venecias, është organizëm këshillues mbi çështjet kushtetuese. I krijuar më 1990-n, komisioni ka luajtur rol kryesor në miratimin e kushtetutave, që janë konform standardeve të trashëgimisë kushtetuese të Europës. Fillimisht u konceptua si një mjet për rregullime kushtetuese emergjente, ndërsa tashmë komisioni është shndërruar në një konsulent ligjor i pavarur, i njohur ndërkombëtarisht.
Por çuditërisht tek ky Komision prej disa vitesh shkojnë vetëm çështje nga Shqipëria, pasi asnjë vend tjetër në Evropë, edhe ata të dala nga sistemi komunist i Lindjes nuk ka nevojë për ta, pasi kanë krijuar institucionet e tyre të pavaruara.
Ashtu si Gjykata Kushtetuese e Shqipërisë… e pavaruar nga qytetarët por e varur nga qeveria. Nuk ishin në gjendje të dilnin me një vendim, ndoshta jo se janë të paaftë për të shqyrtuar një çështje kaq të qartë, por janë nën frikën e pushtetit, ose akoma më rëndë janë futur vetë nën obrellën e mazhorancës.
30 qershori 2019 nuk ishte ditë zgjedhjesh, por votime, madje në disa bashki ishin aq fiktive sa dukshëm në kundërshtim me ligjin u regjistrua jashtë afateve të përcaktuara një parti e dalë nga “llogjet e Kavajës” ku Astrit Patozi formoi Bindjen Demokratike dhe pranoi të bëhej pjesë e farësës që dihej si do të përfundonte. Në fund Rama fitoi 61 bashki, ndonëse 10 % e bashkive në vend aktualisht kanë mbetur pa kryetar, pasi kandidoi persona me rekorde kriminale. Deri sa të merret një vendim, Gjykata Kushtetuese po qëndron nën “hijen e rrapit” të selisë së PS-së, në pritje që të ndërsehet me urdhër nga ai që ua ka në duar litarin e tyre.
