Ja si e kujton Rama fitoren e 23 qershorit 2013, kur kishte në krah Ilir Metën

Kryeministri Edi Rama ka kujtuar sot fitoren e socialistëve në zgjedhjet e 23 qershorit 2013, kur shqiptarët i dhanë mandatin e parë si për të qeverisur, me një koalicion me LSI dhe parti të tjera.

Në një postim në rrjetin social “Instagram”, Rama shkruan se si sot 8 vite më parë shqiptarët i besuan të ardhmen e tyre PS-së.

“Si sot 8 vite më parë shqiptarët i besuan të ardhmen e tyre Partisë Socialiste të Shqipërisë🙏
#ShqipëriaEArdhmjaJonë”, shkruan Rama.

8 vite më parë, më 23 Qershor 2013, pas qeverisjes 8-vjeçare të demokratëve, zgjedhjet parlamentare i fitoi Partia Socialiste e udhëhequr nga Edi Rama, por në koalicion me LSI. Fitorja e mandatit të parë si Kryeministër nga Edi Rama u parapri nga marrëveshja e 1 prillit, kur në prani edhe të Boris Tadiç, dy politikanët e majtë zotoheshin për bashkëqeverisje.

Ndërkohë që PS në zgjedhjet e 25 prillit ka arritur të marrë edhe mandatin e tretë radhazi, por pa LSI.

Bashkëqeverisja e Ramës me LSI-në që drejtohej nga Ilir Meta zgjati vetëm 4 vite, më pas Kreu i PS flaku aleatin e tij strategjik, me të cilin ka një raport kompleks, nga një miqësi deri te armiqësia.

Madje për ta bërë më të besueshme marrëveshjen e firmosur prej tyre në Shkodër, nën bekimin e Boris Tadiç, Rama dhe Meta angazhoheshin se “zhvillimi konstruktiv i bashkëpunimit mes PS-së e LSI-së bazohet mbi parimet e kushtetutshmërisë e të ligjshmërisë së të gjithë faktorëve institucionalë, politikë e shoqërorë, garantimit të lirive e të drejtave të opozitës dhe kërkimit të konsensusit sa më të gjerë në procesin vendimmarrës përmes gjithëpërfshirjes e vendosjes së prioriteteve të procesit të ndërtimit të Shqipërisë europiane mbi çdo prioritet partiak”.

Në fakt, koha tregoi se kurrë dy partitë nuk arritën që të shmangin “prioritetin partiak”, ndërsa ish-Kryeministri Sali Berisha e konsideroi koalicionin ” si aleanca e qelbësirave”. Rama dhe Meta mburreshin pas zgjedhjeve të 23 qershorit 2013 për 1 mln shuplakat që shqiptarët i kishin dhënë Sali Berishës dhe qeverisë së tij. Por koha tregoi se Rama shfrytëzoi 1 mln shuplakat edhe për të goditur Ilir Metën, më shpejt ndoshta se ky i fundit mund ta kishte menduar.

LEXO EDHE  Dhuna ndaj Ergys Gjençajt/ Basha: Produkt i modelit Rama

Pa koalicionin me Metën në 2013, Rama do e kishte të vështirë të merrte mandatin qeverisës, sikundër pa mbështetjen e LSI së drejtuar po nga Ilir Meta, ai nuk do të mund të fitonte mandatin e Kryebashkiakut të Tiranës, në zgjedhjet vendore të 2007-ës.

Në atë kohë LSI e Metës mburrej me 200 mijë zemrat që do të rrihnin majtas, ndërsa Rama i ngazëllyer, ndoshta thurrte planet se si do të fundoste aleatin e tij kryesor, gjë që duket se e arriti pak vite më pas, kur edhe për interesat pragmatiste, arriti që të “izolonte” Ilir Metën si President, ndërsa LSI e Petrit Vasilit dhe më pas Monika Kryemadhit, pothuajse e bëri inekzistente përsa i takon peshës së mandateve në Parlament.

Sot Rama është kthyer në kundërshtarin më të fortë të Ilir Metës, i cili që prej 2017-ës mban postin e Presidentit. Kryeministri ndërmorri nismën për shkarkimin e Metës si President, ndërsa për partinë e themeluar nga Ilir Meta, kreu i PS ishte zotuar që do e çonte për skrap. Në fakt nga 19 mandate që kjo parti arriti të marrë në 2017, në zgjedhjet e fundit parlamentare ajo mori vetëm 4 mandate, edhe pse numëronte në rang vendi mbi 100 mijë vota.