Një ngjarje që mund të kishte përfunduar në mënyrë fatale për jetën e një të riut është shënuar orët e vona të mbrëmjes së djeshme në Malliq. Në fshatin Pendavinj, një 30-vjeçar, në vazhdën e një konflikti, ka qëlluar me armë zjarri në drejtim të një 29-vjeçari. Nga të shtënat nuk ka pasur të lënduar, ndërkohë autori është arrestuar.
Ngjarja
Policia njoftoi këtë të Mërkurë, se “rreth orës 22:30 të mbrëmjes së djeshme, pas marrjes së njoftimit se në fshatin Pendavinj-Maliq, shtetasi J Q., 30 vjeç, gjatë një konflikti për motive të dobëta, me shtetasin B. D., 29 vjeç (i dënuar më parë për armëmbajtje pa leje), kishte qëlluar me armë zjarri tip automatik në drejtim të tij, pa i shkaktuar lëndime, shërbimet e Komisariatit të Policisë Maliq, në bashkëpunim me Strukturat për Hetimin e Krimeve në Dvp Korçë dhe Forcat Speciale ‘Shqiponjat’, shkuan menjëherë në vendngjarje dhe bënë të mundur parandalimin e përshkallëzimit të mëtejshëm të konfliktit, kapjen dhe ndalimin e autorit të dyshuar të ngjarjes”.
Nga veprimet e mëtejshme dhe kontrolli i ushtruar në banesën e shtetasit J.Q., u gjetën e sekuestruan në cilësinë e provës materiale krëhëra automatiku dhe pushke, pjesë të tjera përbërëse të armëve të zjarrit dhe municion luftarak, shtuan të njëjtat burime.
Ndaj 30-vjeçarit rëndojnë akuzat për veprat penale “Vrasja me dashje”, e mbetur në tentativë dhe “Armëmbajtja pa leje”.
