Bebe Rexha ka treguar se në të ardhmen dëshiron të realizojë disa ëndrra, si më shumë të brendshme femrash, një diplomë master në psikologji dhe diçka e madhe që lidhet me ushqimin.
Këngëtarja shqiptare me famë botërore zbuloi se çfarë do t’i thoshte vetes në moshën 16-vjeçare, teksa fliste në një intervistë për “Bustle”.
“Do i thoja vetes të merrte frymë thellë, të jetonte momentin dhe të mos e merrte çdo gjë pranë zemrës. E kam sforcuar shumë veten. Dhe akoma kështu jam. Por do doja të isha më pak dhe të shijoja momentin.
Kam kërkuar shumë prej vetes. Edhe kur isha 16 vjeç, isha e etur, gjithmonë thoja: çfarë kam për të bërë tjetër? Pse po e bëj këtë? Pse nuk e bëj dot këtë? Do doja ta kisha shijuar më shumë rrugëtimin. Do i thoja vetes të merrja frymë thellë dhe të ngadalësoja”,- u shpreh Bebe.
Kur u pyet se ku e sheh veten pas 16 vitesh, artistja tha: “Gjashtëmbëdhjetë vjet nga tani? Uau. Epo, unë padyshim që dua të marr diplomën e masterit në psikologji. Do të më pëlqente të ndihmoja artistë të tjerë në biznesin e muzikës dhe njerëz në përgjithësi si terapiste.
Sepse kam kaluar shumë duke qenë në vëmendjen e publikut dhe duke qenë në industri. Unë do të doja të ndihmoja artistë, aktore ose aktorë ose njerëz të rinj, që mund të kenë nevojë për të. Dua t’u tregoj se çfarë kam mësuar“.
