Policia konfirmon arrestimin e dy personave të dyshuar si të përfshirë në vrajën e vëllezërve Haxhia në Durrës, duke publikuar nga pamje nga ndalimi i tyre.
Besian Xhixha dhe Enver Diva u vunë në pranga pasi akuzohen se në bashkëpunim me njëri tjetrin, kanë krijuar dhe siguruar mjetet për kryerjen e vrasjes së dyfishtë.
“Në vijim të punës hetimore të bërë nga strukturat hetimore të Drejtorisë Vendore të Policisë Durrës, në bashkëpunim me Drejtorinë Kundër Krimeve ndaj Jetës dhe Pronës, nën drejtimin e SPAK-ut, për zbardhjen dhe dokumentimin e plotë të vrasjes së dyfishtë të ndodhur në vitin 2020, në tregun e makinave në Shkozet, Durrës, ku mbetën të vrarë me armë zjarri dy vëllezër, bazuar në provat e grumbulluara, mëngjesin e sotëm u organizua dhe u finalizua operacioni policor i koduar ‘Vazhdimi’. Në kuadër të këtij operacioni u bë kapja dhe ndalimi i shtetasve Besian Xhixha, 30 vjeç, banues në Larushkë, Krujë dhe Enver Diva, 42 vjeç, banues në Fushë Mamurras, Kurbin. Për këta shtetas, Gjykata e Posaçme Kundër Korrupsionit dhe Krimit të Organizuar ka caktuar masën e sigurisë ‘Arrest në burg’, për veprat penale ‘Sigurimi i kushteve dhe mjeteve materiale për të kryer vrasje’, kryer në bashkëpunim dhe ‘Mashtrimi’”, njoftoi policia.
“Nga hetimet e kryera dyshohet se këta shtetas, në bashkëpunim me njëri tjetrin, kanë krijuar dhe siguruar mjetet për kryerjen e vrasjes së shtetasve B. H. dhe V. H. (vëllezër). Nën drejtimin e SPAK-ut vijon puna për zbardhjen dhe dokumentimin e plotë të kësaj ngjarjeje dhe kapjen e personave të tjerë të implikuar. Materialet do t’i dërgohen Gjykatës së Posaçme Kundër Korrupsionit dhe Krimit të Organizuar”, shtuan të njëjtat burime.
Lexo edhe:
EMRAT/ Ekzekutimi i vëllezërve Haxhia në Durrës, policia arreston dy të dyshuar
