“Lufta e ftohtë” në distancë mes kryetarit të bashkisë së Vlorës, Dritan Leli dhe socialistëve vijon. Pas refuzimit për “gjyqin” publik në teatrin “Petro Marko” këshilltarët e bashkisë së Vlorës kanë kërkuar një tjetër mbledhje, këtë herë në ambientet e universitetit “Ismail Qemali” me rend ditë diskutimin dhe miratimin e projektvendimit për sekretarin e këshillit.
Por kryebashkiaku Leli ka refuzuar kërkesën për mbledhje në godinën e universitetit duke lënë të hapur vetëm një rrugë, online. Kjo me argumentin se grumbullimet nuk lejohen për shkak të masave anti-COVID. Sa i përket cështjes së sekretarit, ai thotë se nuk ka nxitim, pasi nuk është larguar nga puna, por ka dalë në pension.
“Ndjesë të gjithë lexuesve që e kanë humbur radhën e kërkesave të Këshillit Bashkiak për mbledhje jashtë radhe, por më duhet të sqaroj sërish se qëndrimi im për të zhvilluar mbledhje në ambiente të mbyllura, pavarësisht emrit, ngelet i njëjtë. Theksoj gjithashtu se nuk është bërë asnjë largim nga puna! Sekretari i Këshillit Bashkiak, Agron Gjipali, njësoj si disa kolegë të tjerë që kanë punuar në Bashkinë e Vlorës, gjatë këtyre ditëve, janë njoftuar se kanë plotësuar kushtet për të përfituar pensionin e pleqërisë” shkruan Leli në një postim në Facebook.
Dritan Leli është kryetar i Bashkisë Vlorë që nga viti 2015 dhe është duke ushtruar tani mandatin e dytë. Rrugët e kryebashkiakut dhe kryeministrit Rama u ndanë në mars të këtij viti, kur Leli nuk pranoi të dorëhiqej si kryebashkiak dhe të kandidonte për deputet, ndërsa prej disa javësh kundër tij ka pasur një sulm kryesisht nga deputetët socialistë të qarkut bregdetar që e akuzojnë për gjendjen e infrastrukturës dhe jo vetëm në qytet.
