Gjykata Kushtetuese ka vendosur në mbledhje e sotme zgjerimin e objektit të hetimit për çështjen e Teatrit Kombëtar, duke pranuar në këtë mënyrë kërkesën e bërë nga përfaqësuesit e presidentit Meta, dhe ata të aleancës për mbrojtjen e Teatrit.
Pjesë e hetimit tashmë do të jetë edhe vendimi i këshillit bashkiak të Tiranës, mbi shembjen e Teatrit Kombëtar, ndërsa nuk dihet nëse kjo do të përkthehet më pas dhe në hetim për individë të caktuar që dhanë votën pro shembjes.
Kërkesa tjetër e bërë nga presidenca, për të cilën pritet që të jepet vendim gjatë ditës së nesërme, është pezullimi i të gjitha veprimeve mbi truallin e Teatrit Kombëtar, derisa të jepet një vendim final për çështjen e shembjes.
‘Pas administrimit të provave shtesë që solli këshilli i ministrave, ne u njohëm më në fund me kopjen e aktit që ka vendosur për prishjen e Teatrit Kombëtar, vendim i këshillit bashkiak, i datës 14 Maj, i orëve të vonave.
Pasi pamë vendimin, kërkuam shtimin e objektit, për deklarimin antikushtues të këtij vendimi, dhe kërkuam pezullimin për ndërtimin e godinave bashkëkohore me kulla mbrapa (diskutohet nesër), derisa gjykimi të mbarojë.
Këtë vendim gjykata e pranoi dhe i dha kohë bashkisë dhe qeverisë që të sjellin prova dhe argumenta për këtë çështje gjatë ditës së nesërme’, tha Dervishaj, i cili tha më tej se rreth 60% e provave të kërkuara nga presidenca nuk janë dorëzuar.
