Juristi Ledio Braho u shpreh se për prishjen e Teatrit ka pasur reagime të shumta, ndërkohë që nuk ka pasur asnjë reagim nga ana e Gjykatës Kushtetuese.
Braho u shpreh se në lidhje me çështjen në fjalë janë depozituar disa kallëzime por nuk ka pasur asnjë përgjigje dhe transparencë hetimesh nga ana e SPAK.
“Sot u vu re se ka pasur një shtesë në objektin e kërkimit dhe shtesa ka të bëjë me përfshirjen në objektin e gjykimit në Gjykatën Kushtetuese dhe të vendimit të Këshillit bashkiak, I cili ka vendosur për prishjen e Teatrit Kombëtar. Ka edhe një kërkesë që ka të bëjë me pezullimin e procedurave të mëtejshme për ndërtimin në pasuri që është pasuria ku ka qenë trualli ku ishte Teatri Kombëtar. Ka një sërë kallëzimesh penale që janë depozituar në SPAK apo në Prokurorinë e rrethit gjyqësor të Tiranës në lidhje me këtë çështje dhe ende nuk ka një përgjigje në lidhje më këtë çështje. Deri më tani nuk ka ndonjë transparencë për hetimet që po bën SPAK. Është një hetim që nuk kishte pse të zgjaste kaq shumë”, tha Braho i ftuar në edicionin e lajmeve të Ora News.
Braho ka komentuar se seancën që do të mbahet më 23 qershor për zgjedhjet e vitit 2019, ku thekson se vendimi i Gjykatës Kushtetuese është i rëndësishëm.
“Gjykata Kushtetuese ka njoftuar se me 23 qershor do nisë seanca për zgjedhjet në vitin 2019 dhe do të gjykojë në lidhje me kushtetueshmërinë e zgjedhjeve. Vendimarrja e Gjykatës Kushtetuese është shumë e rëndësishme. Zgjedhjet e 2019 kanë qenë problematike, sidomos në të gjitha ata bashki kur ka qenë vetëm një kandidat i vetëm”.
Braho u shpreh se situata aktuale politike që është krijuar në vendin tonë vjen si shkak e mungesës së Gjykatës Kushtetuese.
“E gjithë kjo situatë ka ardhur si pasojë e mungesës së Gjykatës Kushtetuese, e pushtetit gjyqësor, e daljes së opozitës nga parlamenti. Është situatë jo normale për një demokraci. Nëse Gjykata Kushtetuese shpall zgjedhjet e 2019 legjitime, do të zgjidh dhe pasojat dhe mënyrën se si do të bëhen zgjedhjet e ardhshme. Favori është se kemi një Gjykatë Kushtetuese, edhe pse nuk është në numrin e caktuar”.
