Qeveria portugeze vendosi sot të ngadalësojë procesin e rihapjes në Lisbonë dhe në tre komuna të tjera në vend për të luftuar kundër një ringjalljeje të pandemisë COVID-19.
Përveç Lisbonës, edhe komunat Odemira (në jug), Braga dhe Vale de Cambra (në veri) do të vazhdojnë të zbatojnë masat antiCOVID-19 në fuqi deri më 27 qershor.
“Situata e këtyre komunave nuk na lejon të vazhdojmë rihapjen”, tha zëdhënësja e qeverisë, Mariana Vieira da Silva, pas një këshilli ministrash, duke specifikuar se numri i rasteve ishte rritur në Lisbonë, veçanërisht midis “më të rinjve”.
Në pjesën tjetër të vendit, procesi i rihapjes do të vazhdojë në përputhje me termat e zbuluar në fillim të qershorit nga qeveria.
Autoritetet shëndetësore portugeze regjistruan 890 raste të reja të COVID-19 në 24 orët e fundit, por pa vdekje.
Ky është numri më i lartë i rasteve të reja gjatë një dite që nga fillimi i rihapjes më 15 mars.
