Meta injoron shkarkimin nga Kuvendi, përshëndet me këngë /VIDEO

Presidenti Ilir Meta vijon të kalojë votimin e Kuvendit për shkarkimin e tij.

Në faqen e tij në FB, ai ka ndarë me ndjekësit sërish impresione nga ceremonia e sotme në Presidencë ku vlerësoi me titullin e lartë “Naim Frashëri” Ansamblin Folklorik të Dibrës “Hazis Ndreu”.

“Në çdo hymn, këngë, elegji dhe rapsodi, në vallet, në lojrat e larmishme dhe në kostumet popullore të Dibrës gjendet një thesar unik dhe i jashtëzakonshëm kulturor, ngjyrat e jetës dhe bukuritë natyrore të kësaj treve, me shpirt atdhetar dhe artistik të fuqishëm”, shkruan Meta.

Gjatë kësaj ceremonie, Kastriot Tusha dhe Arif Vladi interpretuan edhe këngën e tyre më të re “Hymni i Djelmnis Dibrane”.

“Nuk mund të mos ndaj me të gjithë ju, kënaqësinë që përjetova sot, prezantimin për herë të parë dhe pikërisht në Institucionin e Presidentit të Republikës, të një krijimi artistik tepër të arrirë, “Hymni i Djelmnis Dibrane”, të interpretuar mjeshtërisht nga dy prej korifejve të këngës shqiptare, Kastriot Tusha dhe Arif Vladi, që prezanton denjësisht gjithçka Dibra simbolizon për kombin shqiptar. Duke ju uruar një natë të qetë ju ftoj ta shijoni këtë këngë kaq të bukur”, shkruan Meta më tej, duke postuar edhe këngën.

Me 104 vota pro, 7 kundër dhe 3 abstenim, Kuvendi votoi shkarkimin e Ilir Metes nga posti i Presidentit të Republikës. Kushtetuesja do të japë verdiktin final lidhur me shkarkimin ose jo të Metës.