Prokurori i Korçës, Gentian Stoja nuk arriti të kalojë shkallën e parë të vettingut.
Komisioni i Pavarur i kualifikimit vendosi shkarkimin e tij nga detyra për shkak të problemeve me pasurinë e tij dhe të bashkëshortes.
Gjatë shqyrtimit të dosjes së tij u konstatua se përpara martesës, bashkëshortja e tij kishte në gjendje 4.4 milionë lekë të siguruara nga qiraja e apartamentit që kishin prindërit e saj në Durrës.
Një pjesë e kësaj shume është shpenzuar prej saj pasi ka qenë e papunë nga viti 2009 deri në 2012.
Ndërkaq në ditën e martesës ata kishin marrë 50 mijë euro dhuratë me qëllim për të blerë një apartament.
Stoja shpjegoi se në të dy rastet paratë i ka kthyer. Në vitin 2019, ai bleu një shtëpi përmes një kredie.
Gjithashtu prokurori kishte blerë dy makina me çmim të ulët ndërsa i ka shitur pas disa vitesh përdorimi me një çmim më të lartë.
Por duket se argumentet nuk kanë qenë bindëse dhe Stoja do ti shtohet listës së gjatë të të shkarkuarve. Në seancë dëgjimore këtë të martë përpara KPK-së ishte dhe gjyqtari i Shkodrës, Besmir Stroka.
Dy shtëpi në Tiranë, një automjet me vlerë 14 mijë euro si dhe disa depozita bankare janë pasuritë e tij, për të cilat deklaroi burim kursime nga prindërit dhe paga e tij si gjyqtar.
Nga ana e komisionit nuk u vu re asnjë problematikë lidhur me deklarimin apo fshehje të pasurive duke thënë se ai ka pasur burime të ligjshme. Edhe në aftësitë profesionale dhe pastërtisë së figurës, gjyqtari nuk hasi asnjë problematikë.
DENONCO