Humbja ndaj Çekisë, si u vlerësuan fubollistët kuqezinj mbrëmjen e sotme?

Ndeshje e vështirë e kuqezinjve ndaj Republikës Çeke, duke treguar varësinë e futbollistëve më të vjetër. Kishte pak harmoni në grup, ndërsa disa futbollistë shfaqën vështirësi në përshtatjen me skemën e preferuar të trajnerit.

Perla e Cikalleshit shënjon një gur kilometrik të rëndësishëm për sulmuesin. Bare mbetet motori i skuadrës, ndërsa Gjimshiti, veshur me spaletat e kapitenit, tregoi pjekuri dhe profesionalizëm.

Notat e lojtarëve:

Selmani 5.5 – Në një ndeshje nën ton, bëri një paraqitje me nivel të pranueshëm, duke i bërë vend vetes për të ardhmen

Kumbulla 6 – Një aset i çmuat i skuadrës që po rritet gjithnjë e më shumë.

Ismajli 4.5 – Nuk ishte ndeshja e tij. Për asnjë moment nuk arriti të përshtatet me rreshtimin e skuadrës, duke rënë në gabime të një paanshme.

Gjimshiti 6 – Është padyshim një prej futbollistëve më të rëndësishëm të skuadrës.

Trashi 4.5 – Hasi shumë vështirësi me kundërshtarin në formë shumë më të mirë fizike. Vështirësi në përshtatjen me skemat.

Veseli 5 – Ndeshje e vështirë dhe për Veselin, veçanërisht në mbulimin e afërt të kundërshtarit. Shumë herë jashtë pozicionit.

Bare 6.5 – Një futbollist luftarak, me grintë dhe aftësi të mira. Shumë i komunikueshëm me të gjithë skuadrën.

Abrashi 6 – Është rikthyer në vendin e tij. I fortë në lojën mbrojtësi dhe me shpejtësi në daljet e skuadrës.

Kallaku 4.5 – Shfaqi shumë emocione më lojën e tij dhe nuk arriti të përshtatet.

Manaj 5 – Shumë i fuqishëm, por pak i organizuar. I izoluar nga kundërshtari.

Cikalleshi 6.5 – Perla që shënoi në fundin e pjesës së parë i dha statusin e lojtarit më të mirë për kuqezinjtë.

Reja 5.5 – Me mungesat e shumta kishte vështirësi, por ndër të tjera nuk kishte krijuar harmoni brenda grupit.