Nga Edison Ypi
Kuja profetike
Zonjës së Eqerem Bej Vlorës i kishin mbetur nja 30 hyzmeqarë. Kaq hyzmeqarë mund ti sillnin Bejlereshës, jo një gotë ujë, por tërë Vjosën.
Megjithatë Bejleresha vuri kujën me duart nga Qielli: Boboooo si jemi katandisur. S’ka kush na sjellë një gotë ujë!
Kaluan 20 e kusur vjet.
Hyzmeqarët e bejlerëve u bënë ministra dhe nëpunësa. Bejlerët e hyzmeqarëve përfunduan nëpër burgje dhe pushkatime.
Kuja e Bejlereshës kishte qënë profetike.
Pa bejlerë, pa hyzmeqarë, pa gota, pa ujë, pa brek në bythë, pa byth në brekë, pa asgjë prej gjëje, Shqipëria u bë e tëra shkretëtirë.
Po cilët ishin, në të vërtetë, “bejlerët dhe agallarët” e Shqipërisë, ata që, falë propagandës së kurvit mbështetur nga hyzmeqarët, për veshët e shqiptarëve të sotëm ende tingëllojnë si “xhindët dhe lugetët”?
Bejlerët dhe agallarët e Shqipërisë ishin “barinjtë” më të mirë të Historisë së saj.
I gjithë mendimi iluminist është përpunuar dhe përcjellë prej Bejlerëve. Pothuaj të gjithë rilindasit shqiptarë ishin Bejlerë. Poeti më i madh rilindas ishte një Bej.
Eqerem Bej Vlora ishte eruditi dhe atdhetari më i madh i kohës së vet, dhe një nga më të mëdhenjtë e Historisë së Shqipërisë.
Dëshmitë historike më të besueshme për individët dhe situatat më të vështira të periudhës më problematike të Shqipërisë moderne, i ka dhënë pikërisht Eqerem Beu, konservativi më serioz dhe më i ndritur, i biri i Bejlereshës së kujës profetike.
Eqerem Beu, vendin e tij dhe popullin e tij, i donte dhe i sundonte.
Ta sundosh atë që do, dhe ta duash atë që sundon, për shumicën e shqiptarëve të sotëm, është paradoks, nuk bën sens. Derisa pohimin e mësipërm ta kuptojnë dhe ta pranojnë, shqiptarët do vuajnë.
Shqipëria ka nevojë për barinj të mirë, pra për bejlerë. Kot lodhen parellinjtë e sotëm t’i konkurrojnë Bejlerët.
Nga Eqerem Beu tek gjyshi im që e mbushi Shqipërinë me kopilat e tij, bejlerët janë të pa konkurrueshëm.
Para se ta pushtonte hordhia e komunistave, në raport me popullsinë Shqipëria kishte aq Bejlerë, Agallarë, Zotërinj, fukarenj, hyzmeqarë, sa kishin të gjitha vendet përreth saj.
Pa u rivendosur ky raport, s’bën hajër Shqipëria.
U bëtë të gjithë hyzmeqarë dhe të gjithë bejlerë. I provuat të dyja, dhe përpikmërisht sipas Kujës Profetike të Bejlereshës, nuk i dhatë dot asnjë gotë ujë njëritjetrit.
Pa Bejlerë, ju hedh në erë tritoli, ju grin korrupsioni, ju përpin fukarallëku, ju zhduk krimi në familje. Pa Bejlerë nuk mund të arrini kurrkund. Pa bejlerë do kalbeni. Pa Bejlerë do ngordhni.
Nuk e bëjnë dot Shqipërinë halabakët, hyzmeqarët, proletarët.
Shqipërinë e bëjnë vetëm Bejlerët.
