Vaksinë turke, spital turk, shtëpi turke, kryeministër badihava

Nga Boldnews.al

Iku me një avion turko-shqiptar, për vizitë në Turqi dhe ndërsa po kthehej, bëri edhe një foto nga avioni duke stampuar në memorie shtëpitë që po ndërtohen në Fushë-Krujë, po nga turqit. Edi Rama e hodhi si “foto dite” atë pamje, por përtej asaj që e konsideron si “miqësi të mirë”, fshihet jo vetëm politika e ditës për interes, por rreziku drejt kujt po shkon Shqipëria?

Presidienti turk Rexhep Taip Erdogan, i kthyer në një lider problematik për vendet e BE-së dhe i akuzuar për autoritarizëm të theksuar në qeverisjen e tij, i është përgjigjur Ramës sa herë ka pasur nevojë. Në interes total për zgjedhjet, Rama siguroi vaksina kineze që prodhoheshin në Turqi, duke nënshkruar kontratën për 1.2 milionë dozash, pak javë para 24 prillit.

Gjithashtu Rama përdori për fushatë Spitalin e Fierit si dhuratë nga Edogan dhe herë pas here vizitonte zonën e Laçit dhe Fushë-Krujës ku po qeveria turke po ndërton 550 shtëpiza për personat që u dëmtuan banesat nga tërmeti i dy viteve më parë.

Jemi të orientuar nga Stambolli dhe jo Brukseli që është epiqendra politike e Bashkimit Evropian. Do donim një kryeministër që vizitat e shpeshta ti kishte në Berlin, Paris, apo Bruksel, ndonëse faktet tregojnë se ka bërë krejt të kundërtën. Rama pritet si “Pasha provincial” në Turqi dhe Serbi, duke i kthyer këto dy vende në destinacionin personal, por me rrezikun se po merr edhe Shqipërinë me vete.

Në katër vitet e fundit të Ramës si kryeministër, vetëm në dy raste ka vizituar zyrtarisht vende të BE-së, edhe ato për shkak të protokollit Evropian në evenimente të ndryshme. Në Gjermani ka shkuar, por u “prit” nga Taulant Balla…, të cilin e mori me vete dhe shpresuan që të paktën në mos Merkelin të takonin ndonjë deputet nga Bundestagu. Përfundoi vetëm me një darkë me Ballën dhe u kthye në Tiranë, për të prerë shpejt “biletën” për në Stamboll. Tashmë kemi gjithçka turke, përfshi edhe politikën e Ramës që e ka kthyer po në një “telenovelë turke”, e cila nuk dihet se kur dhe si do të përfundojë me seriale dramatik për qytetarët.

Kryeministri e ka dhënë Shqipërinë “badihava”, duke u mjaftuar vetëm me disa dhurata që e ndihmojnë për të mbajtur pushtet me çdo kusht. Megjithatë Turqisë në emër të miqësisë i ka ofruar shumë, përfshi edhe mënyrën e qeverisjes së njëllojtë me dy miqtë “për kokë”, Erdogan dhe Vuçiç.