Përfaqësuesi ligjor i Partisë Demokratike, Marash Logu ka paralajmëruar mbrëmjen e sotme se duke filluar nga nesër beteja kundër procesit zgjedhor të 25 prillit do të zhvilllohet në Kolegjin Zgjedhor.
Në një shkrim në Facebook, Logu shprehet se nesër Kolegji Zgjedhor do të tregojë nëse është në krah të ligjit duke pranuar të gjitha provat e PD-së dhe duke administruar edhe provat shtesë, apo do të vazhdojë historinë e vendimeve si ai i fletëve të votimit që bëri nul vullnetin e 83 mijë shqiptarëve.
Ndër të tjera, marash Logu thotë se prej tre javësh shqiptarët kanë dëshmuar përpara KAS faktet e faktet e pakundërshtueshme të masakrës zgjedhore të 25 prillit.
Ai përmend si shembull legalizimet e bëra për fushatë, punësimet elektorale, pagat shtesë për administratën me qëllim elektoral, ndihmat ekonomike, pagesat për dëmet e tërmetit, apo lënia pa votuar e mbi 500 mijë shqiptarëve.
Më tej, Logu akuzon anëtarët e PS-së në KAS, të cilët i quan tre noterët e masakrës zgjedhore që vendosën të sillen si shërbëtorë të Edi Ramës, në vend të zbatimit të ligjit.
Në fund Logu siguron qytetarët që ata do i qëndrojmë besnik angazhimit solemn para të gjithë shqiptarëve dhe beteja do të vazhdojë në çdo front, me të gjitha mjetet dhe mundësitë që ekzistojnë, sepse është një betejë për gjithë qytetarët shqiptarë, të cilët janë viktimat e vërteta të 25 prillit.
Reagimi i Logut:
Prej tre javësh qytetarët shqiptarë kanë dëshmuar me zë e figurë nga salla e Komisionit të Ankimeve dhe Sanksioneve faktet e pakundërshtueshme të masakrës zgjedhore të 25 prillit:
Blerje masive e votës nëpërmjet individëve me rekorde të tmerrshme kriminale
+10.003 leje legalizimi
+13.000 punonjës të rinj në administratë qëndrore
63 milionë euro paga shtesë
2.5 milionë euro ndihma ekonomike
1.9 milionë euro “paga lufte”
125 milionë euro pagesa për tërmetin
500% më shumë tendera publikë se mesatarja e 5 viteve të fundit
83 mijë fletë votimi të pavlefshme
523 mijë qytetarë pa të drejtë vote
910 mijë vjedhje të të dhënave personale
Për vërtetimin e secilit prej këtyre fakteve, Partia Demokratike vendosi në dispozicion të KAS mbi 600 faqe shpjegime dhe 450 prova shkresore, foto dhe video. Por, fatkeqësisht tre noterët e masakrës zgjedhore vendosën të sillen si shërbëtorë të Edi Ramës, në vend të zbatimit të ligjit. Ata mbyllën sytë para qindra fakteve e provave, dhe refuzuan paligjshmërisht 171 kërkesa për transparencë të plotë mbi masakrën elektorale të 25 prillit.
Megjithatë, pas dorëzimit të 5 padive të para, nga nesër vazhdojmë betejën në Kolegjin Zgjedhor. Nesër i takon Kolegjit të vendosë nëse do të jetë në anën e ligjit, duke pranuar provat tona dhe marrë çdo provë të kërkuar për të vërtetuar plotësisht masakrën zgjedhore të 25 prillit, apo do të vazhdojë historinë e vendimeve si ai i fletëve të votimit që bëri nul vullnetin e 83 mijë shqiptarëve.
Në çdo rast, ne i qëndrojmë besnik angazhimit tonë solemn para të gjithë shqiptarëve: beteja do të vazhdojë në çdo front, me të gjitha mjetet dhe mundësitë që ekzistojnë. Sepse kjo nuk është betejë as për anëtarët e KAS-it, as për gjyqtarët e Kolegjit, madje as për partitë politike, por për gjithë qytetarët shqiptarë, të cilët janë viktimat e vërteta të 25 prillit.
