Njëra skuadër për të shkruar historinë dhe një tjetër që kërkon të rikthejë lavdinë. Spektakli i Champions League ka mbërritur etapën finale dhe ka sërish një betejë tërësisht angleze, sikurse dy vite më parë, kur përballeshin Tottenham dhe Liverpool.
Trofeu më i lakmuar këtë herë diskutohet mes Manchester City dhe Chelsea me takimin e së Shtunës që luhet nga ora 21:00. “Citizens” mbërrijnë për herë të parë kaq larg, teksa në të kaluarën nuk kanë mundur asnjëherë të kalojnë gjysmëfinalet, por nuk mund të thuhet e njëjta gjë për strategun Pep Guardiola. Spanjolli di se si fitohet ky trofe dhe e ka dëshmuar në vitin 2009 dhe 2011, edhe pse për Barcelonën e atyre viteve dukej diçka e thjeshtë.
Nëse për “qytetarët” është e panjohur, skena finale është disi më familjare për Chelsea, që në vitin 2012 mposhti Bayern Munchen dhe u shpall kampion. Blutë e Londrës drejtohen këtë herë nga Thomas Tuchel, gjermani i cili arriti një vit më parë deri në finale me Paris Saint Germain. Chelsea shpreson shumë në rikthimin e Ngolo Kante, liderit të mesfushës, që u dëmtua përballë Leicester në javën e parafundit të Premier League dhe u rikthye në stërvitje vetëm këtë të mërkurë.
Nga kampi tjetër, frika për tërheqjen muskulare të Ilkay Gundogan duket se ka marrë fund, me mesfushorin turko-gjerman që pritet të jetë në fushë nga minuta e parë.
Derbin anglez të Champions e gjykon spanjolli Mateu Lahoz, ndërsa finalja në “Do Dragao” do të mund të ndiqet nga rreth 16 500 spektatorë.
