Shqiptarët shprehën pakënaqësinë me të lartë për sigurinë ekonomike në raport me vendet e tjera të Rajonit në një anketë që u bë nga Këshilli i Koordinimit Rajonal (RCC), për Barometrin e Sigurisë në Rajon.
Siç shihet nga grafiku, 28 për qind e të anketuarve në Shqipëri ishin tërësisht të pakënaqur me sigurinë e tyre për gjendjen ekonomike.
Kjo ishte përqindja më e lartë në rajon, pasi vetëm 24 % e boshnjakëve kanë shprehur pasiguri të lartë për gjendjen ekonomike, 21% e shtetasve nga Kosova, 15% e maqedonasve, 7% e malazezëve dhe 15% e serbëve. Anketa tregoi se, malazezët ishin më të kënaqurit për sigurinë e tyre ekonomike, në raport me vendet e tjera të Rajonit.
Gjithashtu Shqipëria ka përqindjen më të ulët të popullsisë së saj që është shumë e kënaqur me gjendjen ekonomike. Vetëm 2% e shqiptarëve të anketuar janë shumë të kënaqur në situatën e tyre ekonomike. Në të kundërt 8% e boshnjakëve ishin shumë të kënaqur, 12% e Maqedonasve, 20% e malazezëve, 12% e serbeve ndërsa Kosova ishte në të njëjtin nivel me Shqipërinë me 2%.
Anketa në Shqipëri, gjithashtu prodhoi përqindjen më të lartë të personave që ndihen mjaftueshëm të sigurt ekonomikisht. 34 për qind të anketuarve mendojnë në këtë mënyrë, ndërsa 28 për qind e boshnjakeve mendojnë se ekonomia e tyre është e sigurt, 22% e maqedonasve, 33 % e serbëve. Serish malazezët shfaqen nivelet më të larta të sigurisë sa i takon mjaftueshmërisë ekonomike, pasi 42 % ishin mjaftueshëm të kënaqur. Vetëm qytetarët e Kosovës janë treguar disi më realiste thuhet në analizën e RCC, pasi 50 % e tyre kanë mbajtur qëndrim neutral as shumë të kënaqur dhe as shumë të mërzitur me gjendjen e tyre ekonomike.
Ndërsa 40 për qind e shqiptarëve mendojnë se perspektiva ekonomike nuk është e mirë, kundrejt 29 për qind që kanë qëndrim neutral dhe 31 për qind mendojnë se, ekonomia e tyre do të përmirësohet.
Në rajon me pesimistët për ekonominë e së ardhmes mbetën maqedonasit, pasi 52% e tyre se gjendja do të përkeqësohet, ndërsa me optimistët në rajon janë malazezët, pasi vetëm 12 për qind e të anketuarve mendojnë se ekonomia e tyre do të përkeqësohet.
Kur vjen puna tek siguria ekonomike burrat në Ballkan janë më të kënaqur (40%) sesa gratë (32%).
Analiza e RCC tregon se Barometri Ballkanik i sigurisë në edicionin 2021 shënoi një përmirësime të perceptimit për sigurinë ekonomike. Një vit më parë shumica e të anketuarve ishin të pakënaqur me gjendjen ekonomike. Tani, siguria ekonomike perceptohet më pozitivisht, pasi 38% janë të kënaqur dhe 30% të pakënaqur.
Në raport me vitin 2020, numri i të pakënaqurve u ul me 16%, dhe numri i të kënaqurve u rrit me 14%. Në të gjithë Rajonin pak më shumë se një e treta (38%) perceptojnë situatën e sigurisë si të kënaqshme, ndërsa pak më pak se një e treta (30%) nuk janë të kënaqur./ Monitor/
