Historike në futbollin shqiptar, një 16-vjeçar debuton në Kategorinë Superiore

Futbollisti i Skënderbeut, Skerdi Xhixho, është futur në historinë e Kategorisë Superiore, duke u bërë lojtari me moshën më të re që ka debutuar në elitën e futbollit shqiptar.

Lajmi është konfirmuar nga vetë klubi bardhekuq nëpërmjet një postimi në faqen zyrtare.

Vetëm 16-vjeç, 4 muaj dhe 11 ditë, Xhixho u aktivizua në pjesën e dytë në sfidën e fundit të kampionatit ndaj Tiranës, duke zënë vendin e Kaçanollit.

Talenti korçar qëndroi 45 minuta në fushë, duke bërë një paraqitje deçizive. Vlen të theksohet se Xhixho ka qenë kapiten në grumbullimet e fundit me Kombëtaren U-17 të drejtuar nga Ervin Bulku.