Ish-Kryeministri Sali Berisha tha mbrëmjen e sotme në emisionin PolitikOn në Oranews, se ka miratuar vendimet më pro amerikane gjatë kohës qw ka qenë Kreu i Qeverisë.
Berisha tha se pranoi ujgurët, por edhe iranianët, ndërkohë që vende shumë më të mëdha dhe më të zhvilluara se Shqipëria nuk i pranonin.
“Në atë kohë morëm 8 ujgurë, ndërsa vendet e tjera merrnin nga 2 apo nga 3 maksimumi. Gjithashtu kam marrë vendimin për pranimin e iranianëve dhe të vetmin kusht që vendosa ishte që të nxirreshin nga listat e terroritëve dhe Sekretarja Clinton më dha të drejtë”, tha Berisha, duke u shprehur se ka mbajtur qëndrime pro-amerikane.
Gjatë intervistës, Berisha përmendi një detaj kur tha se “askush nuk mund të më imponohej që unë të emëroja një President që më kishin propozuar”.
“Kërkonin të bënin Sandër Lleshajn President, nuk e donin amerikanët, por Ambasadori, i cili do mburrej më pas se kishte vendosur Presidentin.
Qeveria amerikane nuk hyn asnjëherë për të zgjedhur këtë apo atë President. Por individi e bën, dhe e bën ambasadori”, tha Berisha.
