Deputeti Spartak Braho ka sugjeruar që Presidenti Ilir Meta mund të çohet forcërisht në komisionin hetimor të ngritur për të. Deklarata nga Braho – anëtari i komisionit hetimor për Metën – u bë këtë të Hënë në mbledhjen e komisionit, pasi Meta refuzoi të ishte prezent aty, madje e cilësoi jo legjitim komisionin.
“Presidenti mund të sillet edhe me forcë, por mungon vullneti nga ai. Pasi as nuk na njeh. Ky president nuk ka karakter, kjo është themelorja. Më kujtove një ngjarje të viteve të shkuara kur ky president në pozitën e kryeministrit në atë kohë e mori me dhunë, mister Debulesën, pra Berishën. Ashtu siç Berisha e mori këtë me dhunë në 94 në ngjarjen e Poliçanit. Ky veç te tjerave akuzohet për thirrje të dhunshme. I mungon Komisionit Hetimor vullneti për t’a thirrur? Ne duhet të shfaqim vullnetin tone, duhet thirrur me dhunë nesër, ta votojmë këtë vendim”, tha Braho.
Edhe deputetja Bushka mbajti të njëjtin qëndrim. “Mund të kërkohet ardhja e Presidentit të marrë pjesë në Komisionin Hetimor me forcë. Në Kodin e Procedurës Penale parashikohen mjetet nëse refuzohet ardhja në Komision Hetimor”, tha ajo.
Komisioni është ngritur me kërkesë të 49 deputetëve të PS. Sipas tyre, Meta ka shkelur Kushtetutën para dhe gjatë fushatës zgjedhore.
