Penalltia e shumë kontestuar që vendosi fatin e ndeshjes Partizani – Vllaznia, vijon të diskutohet edhe ditën e sotme. Shkodranët arritën të fitojnë falë 11-metërshit të shndërruar në gol nga Marku. Enea Jorgji është në qendër të kritikave për momentin e dyshimtë në zonën e Partizanit. Egzon Belica prek topin me dorë, që duhet thënë se nga pamjet filmike rezulton se ka qenë në pozicion natyral. Qendërmbrojtësi i kuq nuk ka rritur vëllimin e trupit për të ndikuar në devijimin e topit. Kësisoj polemikat janë të mëdha për një sfidë që ka vendosur fatet e sezonit.
I shumë-diskutuar është dhe momenti i dhënies së penalltisë pasi Jorgji vonohet për ta akorduar. Megjithatë burime të sigurta tregojnë se nuk ka qenë elbasanasi ai që ka vendosur për të ndëshkuar të kuqtë. Pas një komunikimi të gjatë në kufje, mësohet se Kreshnik Bajramaj pas porte është shprehur se nuk ka pasur fushë-pamje të qartë. Ndërsa vetë Jorgji ka qenë i mendimit për të akorduar goditje këndore. Nuk ka shkuar të diskutojë nga afër me Bajramajn, pasi në kufje nga ana tjetër e fushës po diskutonte dhe arbitri anësor.
Ka qenë pikërisht gjyqtari Nertil Bregasi që ka akorduar atë penallti dhe duke qenë punë në grup, për t’iu shmangur polemikave, Jorgji është detyruar të japë 11-metërshin. Anësori mban stemën e FIFA-s prej disa kohësh, por e habitshme është se si ka mundur të shohë krahun e Belicës kur distanca është mjaft e madhe, krahasimisht me gjyqtarët e tjerë që ndodheshin më pranë.Newsport.al
