Nga BoldNews.al
“Fusha”, firma e preferuar e Lali Erit po i bën fushë fondet e Bashkisë së Tiranës. Në këtë investigim, BoldNews do të faktojë sesi Veliaj i xhiron mikut të tij Shkëlqim Fusha miliona euro në një skemë shumë të dyshimtë. Në hulumtimet e mëparshme faktuam se “Fusha” fitoi rreth 17 milionë euro për ndërtimin e sheshit “Skëndërbej”. Më pas fitoi rreth 8 milionë euro për pastrimin e kryeqytetit. Sërish tender 1.3 milionë euro për mirëmbajtjen e sheshit kryesor. Dhe, sikur mos të mjaftonin këto, Bashkia e Tiranës i jep edhe 100 mijë euro “bakshish” për të pastruar sheshet, një ndër ta edhe “Skëndërbej”. Por, a nuk fitoi 1.3 milionë euro për ta mirëmbajtur, përse edhe ky fond?!!
Pak ditë më parë, Bashkia e Tiranës shpalli fituesin e tenderit me objekt “shërbime të pastrimit dhe gjelbërimit”. Fondi për këtë tender është 8.429.587 lekë, me TVSH rreth 100 mijë euro. Kohëzgjatja e kontratës ëshrë deri në datën 31 dhjetor 2021. Në këtë tender kanë marrë pjesë “Fusha” me ofertë ekonomike 8.3 milionë lekë dhe “Dion” me 8.4 milionë lekë. Oferta e dytë u shpall e pavlefshme, ndërsa fitoi sërish “Fusha”. Por, nga një hulumtim i dokumenteve rezulton se një nga sheshet që do të pastrohet është edhe sheshi “Skëndërbej”. Por, a e mirëmban “Fusha” këtë shesh?!
Lexoni pak me vëmendje dokumentin e mësipërm! Firma “Fusha” në bashkëpunim me firmën “Pastrime Silvio” kanë fituar një tender të majmë për mirëmbajtjen e sheshit “Skëndërbej”. Objekti i këtij tendëri është mirëmbajtja dhe menaxhimi i sheshit “Skëndërbej” për një afat 36 mujor. Fondi limit për tenderin është plot 133.329.036 lekë të reja ose 1.3 milionë euro. Kontrata është ende në fuqi, ndërsa “Fusha” fiton edhe pagesa shtesë për pastrimin!
Dokumentet që publikuam faktojnë se “Fusha” paguhet disa herë për mirëmbajtjen e sheshit kryesor të kryeqytetit. Por, ajo fitoi të gjitha tenderat për ndërtimin e këtij sheshi. Në total, ky shesh i ka kushtuar shqiptarëve plot 17 milionë euro. Dhe, sërish taksapaguesit paguajnë për mirëmbajtjen dhe pastrimin, pavarësisht se është e njëjta gjë.
Por, a ka fituar tender “Fusha” për pastrimin e Tiranës? Natyrisht që po, madje pjesën më të madhe të këtyre fondeve. Disa muaj më parë, BoldNeës publikoi investigimin se firma e z.Shkëlqim Fusha fitoi pjesën më të madhe të fondit prej 27 miliardë lekë. Ajo është shpallur fituese në lotin 4, me një fond rreth 8 milionë euro.
Pra, skema është shumë e qartë! “Fusha” fitoi miliona për ndërtimin e sheshit. Fitoi sërish miliona për mirëmbajtjen. Dhe, në dy tendera të tjerë, po fiton sërish miliona për pastrimin. Pavarësisht se sheshi është në administrim të Bashkisë, të gjitha të ardhurat nga parkimi po shkojmë në xhepat e kësaj firme! Të jetë rastësi vallë?!
