“Derbin e zgjidhim në minutat e para”, drejtori i Partizanit: Na ka braktisur fati, meritonim fitoren ndaj Skënderbeut

Dr. Sportiv i Partizanit, Olsi Rama, nuk e fshehu zhgënjimin për barazimin ndaj Skënderbeut në Korçë ku sipas tij, skuadra meritonte 3 pikët me paraqitjen e bërë.

“Barazimi nuk prish ecurinë, sepse gara është krejtësisht e hapur. Thjesht të pëlqen të jesh gjithmonë në krye të renditjes se të duket sikur kontrollon më mirë fatin tënd. Erdhëm në Korçë për të marrë 3 pikët, ekipi e interpretoi shumë mire ndeshjen në pjesën e parë.

 Ndoshta në pjesën e dytë pati një moment, mbase mosvëmendje dhe u ndëshkuam dhe nuk arritëm më pas të konkretizonim. Një ndeshje që duhej të ishte më e thjeshtë në letër por që rezultoi më e vështirë nga impenjimi i Skënderbeut”.

I pyetur nëse zgjedhjet e Dajës me ndërrimet ndikuan në rënien e skuadrës, Olsi Rama e tejkalon dhe nuk pranon të diskutojë zgjedhjet e trajnerit por tha se skuadrës i mungon prej kohësh fati.

Daja gaboi me zëvendësimet? Kjo nuk është pyetje për mua, nuk futem në detaje tekniko-taktike. Rënia mendoj se ishte një goditje psikologjike nga goli që pësuam, për mendimin tim Skënderbeu ishte inekzistent në 45 minutat e para deri në momentin e golit që erdhi nga një goditje standard, aksidentale. Skënderbeu e ka rritur nivelin e lojës, djem të rinj, entuziazmi i ndihmoi të mbanin ritmin dhe gjithashtu ndërprerjet e shumta të lojës e ulën shumë ritmin dhe nxorrën jashtë faze lojtarët e ekipit tonë. Ishte një kontrakolpo psikologjike që lojtarët pësuan, nuk patën fat. Po pres ndeshjen ku do të na buzëqeshë fati pasi kanë ngelur 4 javë dhe nuk kemi patur absolutisht as edhe njëherë fat që të shënojmë në minutat e fundit. E kemi kërkuar madje e kemi pësuar.”

Në fund, Rama u shpreh se kjo ndalesë do të merret si mësim teksa tha me siguri se në derbi, Partizani do ta kërkojë që në fillim fitoren ndaj rivalëve.

“Fitoren me Tiranën do ta kërkojmë që në minutat e para, as që bëhet fjalë. Ekipi ka një fizionomi loje, një rritje të konsiderueshme, koshient për forcat e veta. Ndoshta ekipi u tregua prezuntuoz kur pësoi golin por këto janë gabime që edhe bëhen në një kampionat të gjatë. Është fundi dhe kushtojnë më shumë por mendoj se e meritonim plotësisht fitoren dhe 3 pikët, nuk e diskutoj fare. Mjafton që të shikojmë mbajtjen e topit dhe rastet, nuk di. Ishte një gjuajtje gjithsej që erdhi në portë dhe përfundoi në rrjetë. Ky është futbolli, qëllon që në një situate të tillë, kur ke kontrollin ta humbasësh. Është një mësim që duhet nxjerrë dhe besoj që do t’ia arrijmë”./Oranews