Maliqi: Nisma për shkarkimin e Metës, diversion politik. Ja çfarë synohet

Diversion politik për të shmangur vëmendjen nga vjedhja e votave me patronazhistë, e ka cilësuar deputeti Lefter Maliqi, nismën e ligjvënësve të PS-së për shkarkimin e Ilir Metës nga posti i Presidentit.

I ftuar në studion e Oranews, Maliqi tha se dora kriminale bëri batërdi në zgjedhje nën thundrën e policisë dhe Prokurorisë, që i kanë dhënë krah krimit për të kërcënuar dhe për të ndarë para mes tyre.

“Nisma për shkarkimi ne Metës, është një diversion politik për të shmangur vëmendjen nga vjedhja e votave me patronazhistë. Kjo është një shashkë e radhës sepse nuk ka një shkelje sepse presidenti largohet vetëm kur bën ndonjë krim të madh.

Dora kriminale bëri batërdi në zgjedhje nën thundrën e policisë dhe prokurorisë që i kanë dhënë krah krimit për të kërcënuar dhe për të ndarë para mes tyre. SPAK-u dhe prokuroritë nuk kanë vepruar aspak lidhur me krimin elektoral. Vepra e blerja e votës ka ndodhur para votimeve”, tha Maliqi.

Sipas tij, komisioni për shkarkimin e Metës është qesharak dhe do të përfundojë si një flluskë sapuni nga deputetët që as do jenë në kuvendin e ri.

“Edhe sot u mblodhën me shpejtësi për komisionin e presidentin. Pamë edhe Baba Takun e Skraparit, ai i dosjes dhe i çantave, në ato dosjet që thoshte se mbante DVD, por mund të kishte edhe para për të kaluar pensionin me babylino. Aq qesharak është bërë ky komision sa dëgjon gjëra të tilla. Ky është një skandal që do të përfundojë si një flluskë sapuni. Të gjithë janë hedhur në rrugë dhe askush nuk do të jetë më deputet në Kuvendin e ri”, tha Maliqi.