Nga BoldNews.al
Përtej një perde artificiale prej hekuri, brenda zyrave të SPAK-ut nuk ka qetësi prej disa kohësh.
Burime nga Struktura e Posaçme Kundër Korrupsionit deklarojnë se ka po zhvillohet një “luftë e ftohtë” ndërmjet drejtuesit të Prokurorisë së Posaçme, Arben Kraja dhe drejtueses së emëruar të Byrosë Kombëtare të Hetimit (BKH), Aida Hajnaj.
Dy personazhet, të paktën sipas ligjit, janë njerëzit më të rëndësishëm për luftën kundër korrupsionit në nivele të larta dhe krimit të organizuar.
Megjithatë, ajo që duhet të funksiononte si një menaxhim perfekt ndërmjet dy strukturave, duket se është bërë shkak për përplasje.
Ndërkohë që SPAK-u ka mbi një vit që ushtrojnë funksionet, hetuesit e Byrosë Kombëtare të Hetimit, pra trupa që do të furnizojë me informacione prokurorët specialë, ka hyrë në “kalendat greke”.
Njerëz pranë drejtueses së BKH-së, deklarojnë, në konfidencialitet, se Hajnaj beson që pengesë për krijimin e trupës prej më së paku 60 hetuesish është penguar në forma të ndryshme nga drejtuesi i SPAK-ut.
Gara për hetues të Byrosë Kombëtare të Hetimit u shpall në Shtator 2020, menjëherë sapo Këshilli i Lartë i Prokurorisë emëroi ish-drejtuesen e lartë të Policisë në krye të këtij institucioni.
Në garë morën pjesë mbi 600 oficerë të Policisë Gjyqësore dhe juristë të tjerë. Kandidaturat e tyre u shqyrtuan nga një Komision i Posaçëm, i kontrolluar në shumicë nga prokurorë të SPAK-ut, të caktuar me urdhër të drejtuesit të tyre, Arben Kraja.
Pas disa fazave verifikuese, shumica dërrmuese e kandidatëve u skualifikuan. Një pjesë e tyre akuzuan organizatorët për skualifikime të padrejta.
Megjithatë, në përfundim, arritën të fitonin një vend pranë Byrosë Kombëtare të Hetimit vetëm 27 persona, një numër shumë larg kufirit minimal prej 60 që kërkohet nga ligji.
Ky rezultat, aspak pozitiv, duket se nuk është mirëpritur nga Aida Hajnaj, e cila po mbush vitin në krye të një institucioni që nuk ka staf varësie.
Të njëjtat burime konfidenciale deklarojnë se Hajnaj ka vënë në dijeni edhe partnerët ndërkombëtarë për situatën e krijuar brenda Prokurorisë Speciale.
Megjithatë, kjo “luftë e heshtur” duket se, për momentin, ka mbetur brenda zyrave të SPAK-ut dhe nuk ka asnjë qëndrim publik, ndërkohë që Byroja Kombëtare e Hetimit ri-shpalli sërish garën për hetues, në fillim të Prillit 2021.
Nën argumentin e mungesës së hetuesve të BKH-së, drejtuesi i SPAK-ut, Arben Kraja, kërkoi shtesë të prokurorëve në fund të vitit 2020, me qëllim përballimin më të mirë të ngarkesës së punës.
Kuvendi e miratoi kërkesën e SPAK-ut dhe akordoi një fond për shtimin e pesë prokurorëve të rinj.
Por, Këshilli i Lartë i Prokurorisë (KLP), struktura që kryen emërimet e prokurorëve specialë, ende nuk ka ndërmarrë nisma për plotësimin e këtyre vendeve.
KLP duket se nuk është e bindur për të shtuar stafin e SPAK-ut.
Pasi kanë marrë në dorëzim statistikat dhe ngarkesën e punës së prokurorëve të posaçëm, kanë konstatuar se volumi i dosjeve të tyre është i përballueshëm lehtësisht edhe me 10 prokurorët që janë aktualisht në detyrë.
Duke e konsideruar kërkesën e SPAK-ut për shtim kapacitetesh në radhët e prokurorëve si një përkëdhelje të tepruar, KLP vlerëson se, për momentin, nuk mund të kryhen emërime në Strukturën e Posaçme Anti-Korrupsion, aq më tepër që njësi të ndryshme lokale të prokurorisë kanë nevoja më imediate, sidomos pas shkarkimeve masive nga Vetingu.