Nga Valbona Davidhi/ BIRN
Gjykata e Fierit caktoi masën e sigurisë “detyrim paraqitjeje” për Erion Alushaj shefi i sigurimit teknik pranë kompanisë Anio Oil.
40 vjeçari u arrestua të martën, një ditë pas shpërthimit të nënstacionit të pompimit në Qafë Kash ku mbeti i plagosur një naftëtar. Prokurori i çështjes, Çlirim Sina kërkoi që Erion Alushaj, të gjykohet me masën e sigurisë “detyrim për paraqitje” duke argumentuar se i arrestuari nuk është person me rrezikshmëri shoqërore dhe nuk rrezikon të prishë provat për hetimin.
Gjyqtari Taulant Banushi pasi dëgjoi pretendimet e palës mbrojtëse dhe prokurorisë vlerësoi të ligjshëm arrestimin e Alushajt dhe caktoi masën e sigurisë së kërkuar nga vetë organi i akuzës.
Erion Alushaj po gjykohet si personi përgjegjës për aksidentin në sektorin e dekantimit të naftës në Qafë Kash. Alushaj është drejtues i sigurimit teknik pranë këtij sektori që administrohet nga kompania Anio Oil.
Prokuroria e Fierit po heton për “Shkelje të rregullave të sigurisë në punë” ndërsa naftëtari i plagosur ndodhet ende në spital. Viktor Balla pësoi djegie në pjesë të ndryshme të trupit ndërsa nga shpërthimi u shkatërrua pothuajse plotësisht nënstacioni i pompimit pranë depozitave të dekantimit. Policia tha se në nënstacion shpërtheu një pompë centrifugale e më pas mori flakë një tubacion që transporton naftën në depozita.
