Caka e LSI: Po na vonohen qëllimisht pamjet filmike të numërimit të votave, SPAK të hetojë

Lëvizja Socialiste për Integrim ka vijuar me akuzat në lidhje me procesin zgjedhor. Ish-deputetja e LSI, Silva Caka, denoncoi sot se nuk po u vihen në dispozicion pamjet filmike të procesit të numërimit të votave në disa KZAZ, ku LSI pretendon se janë kryer shkelje të rënda,edhe pse kanë bërë prej ditësh kërkesë në Komisionin Shtetëror të Zgjedhjeve.

“Jemi në këtë konferencë për t’ju bërë me dije se prej disa ditësh i kemi kërkuar Komisionit Shtetëror të Zgjedhjeve pamjet filmike të procesit të numërimit për disa KZAZ, ku janë vërejtur shkelje të rënda, të cilat kanë të bëjnë me tjetërsimin e votës së shqiptarëve.”

LSI pretendon se vënia në dispozicion e pamjeve filmike në disa KZAZ ku pretendohet tjetërsimi i votës, po iu vonohet qëllimisht nga kompania që disponon materialet filmike.

“Duam të përmendim faktin se ka patur vonesa në vendosjen në dispozicion të pamjeve filmike për KZAZ-të nr. 66 në Berat, 25 në Shijak dhe 70 në Maliq. Akoma dhe më shumë rëndohet situata për KZAZ-në numër 47 të Elbasanit, ku edhe sot që flasim, 10 ditë pas procesit zgjedhor, ende nuk na janë vënë në dispozicion pamjet filmike të procesit të numërimit. Madje, në informacionet tona edhe Komisioni Shtetëror i Zgjedhjeve, ende nuk është pajisur me këto pamje filmike. Kompania që disponon pamjet filmike, R&T, në pronësi të Renis Tërshanës, ortak me Samir Mane-n, vonon enkas dorëzimin e pamjeve filmike, pikërisht në KZAZ-të ku tjetërsimi i votës, ka marrë përmasa kriminale.”

LSI i ka bërë thirrje SPAK që të hetojë, teksa prej ditësh është në proces grumbullimi të dhënash dhe faktesh që dokumentojnë manipulimet zgjedhore që kjo forcë politike pretendon.