Me portretet e diktatorit Hoxha, ithtarët e diktaturës bëjnë paradë

Një grup ithtarësh të diktaturës komuniste u shfaqën sot me portretet e diktatorit Enver Hoxha, duke përkujtuar 5 majin, ditën e Dëshmorëve të Atdheut.

Me simbolet e komunizmit, personat u shfaqën duke përshëndetur me grusht në Varrezat e Dëshmorëve, aty ku më parë zhvilluan homazhe drejtues më të lartë të shtetit, por edhe opozitës.

Shqipëria është i vetmi vend ish-komunist që mbi 30 vjet pas rrëzimit të komunizmit nuk ka dënuar krimet e shkaktuara nga diktatura, edhe pse mijëra njerëz humbën jetën, eshtrat e të cilëve edhe sot nuk gjenden.

Pavarësisht ndryshimit të qeverive, rezoluta për të dënuar krimet e komunizmit ka munguar, edhe pse ajo që vihet re lehtë është fakti se sa herë Partia Socialiste është në pushtet, ithtarët e diktaturës, shfaqen lirisht me portretet dhe simbolet e diktatorit Enver Hoxha dhe komunizmit.