Guvernatori i Bankës së Shqipërisë, Gent Sejko, ditën e sotme në një konferencë për shtyp deklaroi se ritmi i rimëkëmbjes së ekonomisë është përshpejtuar dhe ekonomia shqiptare ka hyrë në një trend përmirësimi përgjatë tre mujorit të këtij viti.
“Ritmi i rimëkëmbjes së aktivitetit ekonomik u përshpejtua dhe perspektiva e zhvillimit ka ardhur drejt përmirësimit gjatë tre muajve të fundit”, tha ai.
Guvernatori tha se rimëkëmbja nuk është e plotë pasi pandemia e COVID-19 ka ndikuar ndjeshëm në rënien e punësimit dhe në rritjen e papunësisë.
“Këshilli Mbikëqyrës vëren se rimëkëmbja ekonomike nuk është e plotë dhe faktorët e saj mbështetës nuk janë ende të konsoliduar. Pasojat e pandemisë në ekonomi mbeten të dukshme në rënien e punësimit dhe në rritjen e papunësisë”, shtoi z. Sejko.
Më tej, Sejko tha se përgjatë vitit 2021 Banka e Shqipërisë parashikon një vit më optimist dhe se ekonomia shqiptare parashikohet të ketë një rritje mbi 5%.
“Banka e Shqipërisë parashikon një vit më optimist, seç kishim parashikuar në analizat e mëparshme. Rritja ekonomike do jetë mbi nivelin 5%. Ne presim një sezon turistik të mirë. Kjo pritshmëri është e bazuar në faktin se niveli i numrave të infeksionit po vijnë në rënie. Shifrat tregojnë për një rritje ekonomike përgjatë vitit 2021”, shtoi ai.
