Eksperti i Shëndetit Publik, Dr. Erion Dasho, ka reaguar përmes rrjeteve sociale lidhur me vendimin e Komitetit Teknik të Ekspertëve, i cili hoqi karantinën 14 ditore për emigrantët që hyjnë në Shqipëri nga Greqia dhe Maqedonia e Veriut.
Dasho shkruan se ndërkohë që para zgjedhjeve, Komiteti vendosi karantinimin 14 ditor, sot pas zgjedhjeve e heq këtë masë, ndërkohë që situata epidemiologjike në vendin fqinj mbetet e njëjtë.
“Në datën 19 prill, më pak se një javë para zgjedhjeve, komiteti i të ashtuquajturve “ekspertë” vendoste 14 ditë karantinë për personat që mund të hynin në vend nga Greqia. Në 18 prill, numri i rasteve ditore me COVID në Greqi ishte 1,800.
Sot, i njëjti komitet vendos se karantina 14 ditore nuk është më e nevojshme. Numri i rasteve në datën 3 dhe 4 maj në Greqi ka qenë përkatësisht 2,100 dhe 1,400, pra një situatë pothuajse e njëjtë me atë të kohës kur u vendos karantina.
Çdo koment mbi motivet e vërteta të vendimmarrjes së “ekspertëve” tanë do të ishte i tepërt…”, shkruan Dasho.