Eneo Bitri ishte një ndër më të mirët në fushën e lojës ndaj Apolonisë, i cili shpesh herë u vu në shërbim edhe të sulmit për aq kohë sa skuadra nuk po gjente dot golin e fitores. Në intervistën ekskluzive për “Panorama Sport” pas ndeshjes, 24-vjeçari i gëzohet fitores që i jep skuadrës vendin e parë pesë javë nga fundi, duke iu afruar akoma më shumë titullit kampion.
Ai i vendos ekipit notën maksimale deri më tani, por kërkon kujdes që nga ndeshja e radhës me Skënderbeun dhe deri në fund, për më tepër që tani çdo gjë është në dorën e tyre. Beratasi zbulon se ka një ëndërr dhe shpreson që një ditë ta arrijë me paraqitjet e tij, Kombëtaren.
Fitorja ndaj Apolonisë- Mendoj se ishin tri pikë të vlefshme për vazhdimësinë tonë drejt titullit kampion. Ishte një ndeshje shumë e vështirë dhe arritëm të merrnim fitoren falë presionit që po i ushtronim kundërshtarit dhe mendoj se e merituam atë.
Partizani në krye të tabelës- Të them të drejtën rezultatin e rivalëve e kemi marrë vesh në fund, sepse ishim në lojën tonë. Normalisht jemi gëzuar, por akoma nuk ka mbaruar, pasi ka edhe pesë ndeshje për t’u luajtur.
Gara për titull- Tani çdo gjë varet nga ne, por duhet t’ia lëmë fushës së lojës dhe të flasim aty. Kampionati sa vjen e bëhet edhe më i vështirë.
Përballja e radhës ndaj Skënderbeut në Korçë, ndërkohë që në Elbasan ju kanë mundur…
Është përsëri një ndeshje mjaft e vështirë dhe me mjaft rëndësi, sepse edhe këtu do të kërkojmë revanshin tonë për tri pikët. Por, besoj se do t’ia arrijmë qëllimit edhe në Korçë.
Paraqitja e Partizanit në këtë sezon- Duke parë skepticizmin dhe çdo gjë kundra në sensin që nuk bënim dot merkato, mendoj se meriton notën maksimale deri më tani, dhjetën.
Po Bitri në aspektin personal si ndihet? Unë duhet të rritem akoma më shumë, edhe pse kam bërë një sezon mjaft të mirë. Por, kam akoma objektivin tim që të arrij synimin më të lartë që kemi të gjithë, Kombëtaren.
DENONCO