A po i vendos “gjobë” Rama i vogël hoteleve për fiskalizimin?!

Nga BoldNews.al

Në kulmin e pandemisë dhe krizës së thellë financiare, hotelet po detyrohen që të paguajnë një “haraç” te njerëzit afër qeverisë. Në redaksinë e BoldNews kanë mbërritur dhjetëra ankesa, kryesisht nga bizneset akomoduese. Ato ankohen se janë detyruar nga Tatimet që të instalojnë një program “E-Bill”. Gjithçka po bëhet e kamufluar, duke përdorur fiskalizimin. Pra, faturat e vjetra të TVSH-së po zëvendësohen nga fatura online. Jo në E-Albania, siç propagandojnë njerëzit e qeverisë, por në programe të tjera të licensuara nga Drejtoria e Përgjithshme e Tatimeve.

Pra ta thjeshtuar më pak! Disa muaj më parë, mijëra biznese u është thënë se faturat e akomodimit në hotele do të jenë online. Jo më versione të vjetra në blloqe me shënime me dorë. Bizneset janë detyruar që të blejnë një program kompjuterik. Kostoja e këtij programi varion nga 1000 deri 2000 euro. Kjo, në varësi të zërave në këtë program. Pra, në kulmin e pandemisë qeveria u ka vendosur një “gjobë” të majme. Tashmë, secili biznes duhet të ketë pikërisht një program të tillë. Në të kundërt, do të gjobitet me mijëra euro të tjera!

Por, kush qëndron pas kësaj nisme?! Dhe, a është në favor të shtetit apo të individëve që qëndrojnë pas tyre? BoldNews ka biseduar me dhjetëra pronarë hotelesh, duke i bërë një pyetje të thjeshtë; kush qëndron pas këtij biznesi? Përgjigjja e tyre ka qenë Rama! Po cili? Sipas tyre, janë pikërisht njerëzit e afërt të Olsi Ramës (vëllai i vogël i kryeministrit Edi Rama) që po kryejnë këtë “punë”. Ata kanë paguar fillimisht paketën nga 1000 deri 2000 euro. Më pas, me justifikimin e pandemisë, përfaqësues të këtyre firmave kanë bërë trajnimet online.

Një tjetër pikëpyetje e kësaj nisme është se përse po e bën privati këtë procedurë? A ka kapacitete shteti të hartojë një program fiskalizimi? Normalisht që po! BoldNews ka raportuar me dhjetëra herë që Agjencia Kombëtare e Shoqërisë së Informacionit AKSHI zhvillon herë pas here tendera me vlera të larta. Kjo agjenci kontrollon portalin E-Albania, të financuar pikërisht nga taksapaguesit. Dhe, pyetja që na lind të gjithëve është se, përse ky shërbim për qindra mijëra hotele nuk është në këtë platformë? Natyrisht për të mbushur xhepat disa individë, ku dyshimet e pronarëve të hoteleve të çojnë pikërisht te Olsi Rama.

Ky i fundit, u përfol disa vite më parë se ishte pas kërkesës së një kompanie për të menaxhuar TVSH-në. Dhe, atë që nuk e arriti në atë kohë, po e realizon pikërisht në pandemi, ku bizneset janë gjunjëzuar nga kriza dhe përsëritja e vitit të kaluar do t’i detyrojë të ulin përgjithmonë qepenët. Por, ajo që nuk është e detajuar nga tatimet është se çfarë përfitojnë këto firma që ofrojnë këtë shërbim? A marrin një pjesë të TVSH-së që del nga programi i tyre?