Përse e shite fëmijën për pushtetin o i marrë!

Nga Boldnews.al

E shite, fitove ca para. Kush ti dha? Një drejtor i pushtetit, një çantëmbajtës i deputetit, një kriminel që e njeh me rrënjë e degë? E çfarë bleve me ato para? Raki në lokalin që rri gjithnjë, një thes miell, qerase shokët, apo çfarë tjetër… E mbushe për pak kohë atë xhep të zbrazët me paranë e pisët të atyre pisave që të blenë ty, por harrove se për pushtetin e Ramës në fakt ti nuk shite votën, por fëmijën tënd.

Po po, atë që ti linde, e rrite në varfëri dhe pikërisht kur mund të kishe shpresë se diçka mund të bëhej, e nxorre në treg, ia dhe fort lirë një batakçiu që të peshkoi ty o i marrë, o i varfër në mendje. Je për mëshirë sepse nuk quhesh dot kriminel, edhe pse “shite” të ardhmen e fëmijës. Nuk e kupton çfarë ke bërë, je ende nën ekstazën e fitores, duke llomotitur për suksesin e atij që të bleu, fort lirë.

Nuk e kupton ende çfarë ke bërë, mbase nuk do e kuptosh kurrë. Por edhe pse i “shitur” edhe pse i përçudnuar, edhe pse i varfër, ai fëmijë nesër mund të bëhet dikush, i shkolluar me mundim, me shumë dinjitet dhe i zoti në zanat apo profesion. Do ketë turp nga t’i prind, jo se ishe i varfër, por se shite votën, qoftë edhe duke blerë me të ushqimin e pakët të fëmijës që për katër ditë mund ta kishte stomakun plot, por për ta kthyer për katër vite në vasal dhe të përbuzuar të pushtetit të Edi Ramës.

Sepse është i shitur, qoftë edhe një herë atë damkë do të ketë përjetë. Si mund të shitesh, joshesh apo shantazhohesh nga njerëz që se kanë vendin në Parlamentin tënd por në burg? E shite dinjitetin e fëmijës, sepse vetë ti nuk ke dinjitet, për aq kohë sa hyrë në pazar të jap një votë, sa lekë me jep!

Por ti e dhe votën tende, ia dhe pushtetit që kishte tetë vite që në mos të varfëroi më shumë, të la po aq të varfër sa ç’ishe. Nuk u bëre i pasur me paranë e pisët të asaj vote, qoftë ajo edhe 500 euro. Ti sërish po ai do të jesh, por fëmijës tënd nuk duhet tia bëje.

Pasi i fute në xhep ato para edhe mund të behesh i “zgjuar” sa të kthehesh: po ai që më bleu votën, nuk paska faj? Ligjërisht dhe moralisht ai ka faj, madje po bën një krim që as dheu se tret, por atë nuk do e gjejë gjë kurrë, ty po.

Atë blerësin e votës tënde nuk kapë drejtësia e re, SPAK-u jo e jo, sepse e gjitha është një lojë për të mashtruar ty, përkundrazi, ai do bëhet edhe më i madh nga çfarë është. Nëse ka qenë një drejtoruc i vogël Rilindje, ai do marrë post më të madh, sepse do ja japë kryerilindasi si shpërblim që të bleu ty dhe fëmijën tënd. Nëse ka qenë një kriminel, ai do bëhet edhe më i fortë, sepse po ty do të të shtypë dhe policia nuk ka për ta ngarë kurrë dhe do e nderojë si “shefin e madh”.

Çfarë fitove o i marrë. E shitet fëmijën për për të mbajtur në pushtet pikërisht atë që me arrogancë dhe korrupsion do të vijë për të të blerë sërish e sërish e sërish e sërish…, deri sa të lodhet vetë. Edhe atëherë kur fëmija yt të rritet, e ti shitës vote të jesh në buzë të varrit, përsëri fëmija yt do të vuajë. Nga kush do të pyesësh: Nga fëmija i atij që i shite votën!