Në emisionin Opinion, Kryeministri Edi Rama, u pyet nga gazetari Lutfi Dervishi, nëse Ardi Veliu do të shkarkohej nga posti i Drejtorit të Përgjithshëm i Policisë, duke qenë se gënjeu publikisht lidhur me ngjarjen e Elbasanit, ku mbeti i vrarë 1 person dhe u plagosën 4 të tjerë, 4 ditë para zgjedhjeve.
“Unë jam kryeministri i Shqipërisë. Tani jemi pas zgjedhjeve. Ka fituar zgjedhjet Partia Socialiste. Ça i keni kto? Do shikoni filxhanët?”, tha Rama, që u sikletos nga pyetja.
Drejtori i Përgjithshëm i Policisë Ardi Veliu dhe prokurori i Elbasanit, Alfred Shehu dolën në një konferencë për mediat pas vrasjes së Pjerin Xhuvanit dhe u thanë gazetarëve se nga kontrolli i makinave nuk u gjetën materiale zgjedhore. Por pas zgjedhjeve, në seancë gjyqësore, prokurori pranoi se në makinën e Kelmend Xhaferrit u gjetën karta ID, para dhe lista e votuesve me modelin e patronazhistëve.
Ardi Veliu dhe prokurori gënjyen publikisht për provat e gjetura në vendngjarje pas akuzave të PD-së se Mehmet Greca ishte kapur duke blerë vota.
