Edhe qëndrimi që po mbajnë ndaj rezultatit të këtyre zgjedhjeve po thellon më shumë hendekun mes ShBA dhe Gjermanisë apo Britanisë për situatën në Shqipëri. Kjo thyerje që u vu re që në reagimet e prishjes së marrëveshjes së 5 qershorit po konformohet edhe tani.
Duket se më tepër SHBA i intereson stabilokracia dhe zgjatja e pashqetësuar e pushtetit të Ramës. Kjo duket qartë në reagimet e para nga Departamenti i Shtetit, ku as nuk figurojnë fare shqetësimet për parregullësitë dhe vjedhjen e votës.
Zëdhënësi i DASH, Ned Prince, shkroi në “Twitter” se SHBA do të vazhdojë partneritetin e ngushtë me kryeministrin Edi Rama, ndërsa theksoi se respektimi i rezultatit të zgjedhjeve forcon demokracinë në Shqipëri. Të njëjtin qëndrim mbajti dhe ambasadorja e SHBA, Yuri Kim, e cila sa për të larë gojën shtoi edhe këto fjali: “Raporti paraprak i OSBE/ODIHR duhet të përdoret për të përmirësuar më tej zgjedhjet në Shqipëri. Ne përsërisim që zbatimi i ligjit dhe gjyqësori duhet të ndjekin penalisht cilindo që shkel ligjin dhe pengon të drejtën e qytetarëve për të votuar lirshëm dhe në paqe”, shkruajti ambasadorja Kim.
Sikurse shihet qartë në deklaratat amerikane injorohet tërësisht blerja e votës apo hetimi i parregullësive sistematike për të cilat flasin ambasadorët gjermanë dhe britanikë. SHBA duket sikur ka për qëllim të vetëm mbylljen e problemit dhe shantazhimin e opozitës për të njohur sa më parë rezultatin. Ndërsa diplomatët europianë, ndonëse e njohin rezultatin, nuk i fshehin asapak anët negative të asaj që ka ndodhur.
Ambasadori i Gjermanisë në Tiranë, Peter Zingraf, kërkon që të trajtohen sa më parë akuzat dhe ankesat që kanë të bëjnë me zgjedhjet, mes tyre edhe ato për shitblejren e votës.
“Ne kemi ndjekur raportin paraprak të OSBE/ODIHR dhe jemi duke pritur atë përfundimtar. Të gjitha akuzat dhe ankesat, që kanë të bëjnë me zgjedhjet, mes tyre edhe ato për shitblejren e votës, duhet të trajtohen pa vonesë dhe me vendosmëri – në këtë pikë Komisioni Qendror i Zgjedhjeve dhe organet e drejtësisë duhet të marrin përsipër një përgjegjësi të rëndësishme. Vetëpërmbajtja dhe maturia e shumë kandidateve dhe kandidatëve ditën e zgjedhjeve meriton respekt” ka deklaruar ai.
Ambasadori i Britanisë së Madhe në Tiranë, Duncan Norman, ka kërkuar nga institucionet shqiptare të hetojnë të gjitha parregullsitë e pretenduara në lidhje me procesin. “Inkurajojmë institucionet shqiptare të hetojnë të gjitha parregullsitë e pretenduara në lidhje me procesin” ka nënvizuar ai.
Pra diferenca është e dukshme mes atyre që kërkojnë ti vënë kapak zgedhjeve dhe atyre që duan të gjejnë drejtësinë dhe të vërtetën.
/Lapsi.al/
