Një argjendari është grabitur në Vlorë këtë paradite nga një person i armatosur i cili është arrestuar.
Policia njoftoi se rreth orës 11:05, është lajmëruar me një telefonatë se në bulevardin “Ismail Qemali”, në argjendarinë në pronësi të shtetases E.H., kishte hyrë një shtetas, i cili dyshohet se në kërcënimin e armës së gjahut, ka vjedhur një sasi bizhuterish dhe është larguar.
Policia ka mundur të lokalizojë dhe arrestojë autorin e dyshuar, Martin Kapllanaj, 18 vjeç. Ai u vu në pranga në lagjen “Isa Boletini”.
Po ashtu, janë sekuestruar në cilësinë e provës materiale bizhuteritë e vjedhura dhe arma e gjahut me të cilën autori dyshohet se kërcënoi pronaren e argjendarisë.
“Në drejtimin e Prokurorisë vijon puna për sqarimin e plotë të rrethanave të ngjarjes”, thuhet më tej në njoftimin e policisë.
Në qytet janë dëgjuar të shtëna, por policia nuk saktëson në njoftimin e saj se kush qëlloi me armë zjarri.
