Nëse në vitin 2013 shtypi gjermanofon do ta festonte Edi Ramën si një lider, liberal, shpirtlir dhe jokonvencional, tani liderit shqiptar i ka rënë edhe thërrimja e fundit e pluhurit që mbante të shkëlqyer imazhin e tij.
Interesimi i medias gjermanofone për zgjedhjet në Shqipëri ishte relativisht i madh. Pothuajse të gjitha mediumet kryesore patën raportime dhe reportazhe nga Shqipëria, por këtë radhë bie në sy veç qëndrimit kritik, më shumë indinjatë ndaj liderit Rama.
“Çmagjepsja e reformatorit Edi Rama”, e ka titulluar Jana Lapper artikullin e saj në të përditshmen gjermane tageszeitung: “Kur Rama u zgjodh në detyrë me një shumicë të madhe në 2013, ai konsiderohej modern, liberal, jokonvencional… Në fakt, mandati i tij i parë në detyrë solli disa reforma, për shembull në gjyqësor. Por pas rizgjedhjes në vitin 2017, vijoi një skandal pas tjetrit.”
Taz numëron: Lidhjet e ish-ministrave me krimin e organizuar, thirrjet telefonike për shitblerjen e votave nga ministrat e PS-së botuar në gazetën e madhe gjermane “Bild” në vitin 2019, duke tërhequr vëmendjen që si pasojë Rama paditi gazetën e jo të dyshuarit.
“Nga shpresëdhënës në autokrat”
Neue Zürcher Zeitung, në një artikull të korrespondentit nga Stambolli Volker Pabst, konstaton se “shpresa e një fryme të re që solli Ramën në detyrë në vitin 2013, ka kohë që është zvanitur. Në këto tetë vjet thuajse nuk është shënuar asnjë përmirësim dhe shumë gjëra janë bërë më keq. Këtë nuk e mbulon dot as furça e jokonvencionalitetit”, shkruan Pabst më tej.”Pabst kujton miqësinë e tij me presidentin turk Erdogan dhe atë serb, Vuçiq,dhe tërheq paralele me këtë të rundit për “përshtatjen e partisë dhe qeverisë për nevojat personale, eleminimin e konkurrentëve të brendshëm duke krijuar rrjete klienteliste për të siguruar pushtetin”.
Autoritar, agresiv, i papërmbajtur seksist
Adeleheid Woelfl, korrespondentja e mirëinformuar e austriakes “Die Presse”, në një artikull në edicionin e së dielës së zviceranes “Neue Zürcher Zeitung”, e quan kryeministrin e Shqipërisë Edi Rama “autoritar, agresiv, të papërmbajtur, seksist”. “Edi Rama dikur ishte për të luftuar nepotizmin dhe korrupsionin në Shqipëri, për të mbështetur mendimin e lirë dhe demokratik, për të krijuar një shoqëri më sociale, si Kryetar i Partisë Socialiste. Dikur i njohur si artist dhe karizmatik i magjepste vazhdimisht bashkëbiseduesit e tij politikë në Bashkimin Evropian. Një shqiptar të tillë nuk ata nuk kishin parë. i biri i një skulptori dhe një doktoreshe, që kishte studiuar dhe kishte dhënë mësim në Akademinë e Arteve në Tiranë, kishte jetuar në Paris në vitet 1990 dhe më vonë kishte drejtuar Ministrinë e Kulturës së vendit të tij, konsiderohej si një njeri i lirë dhe perëndimor”.
Wölfl jep si shembull ndër të tjera edhe databazën e të dhënave të Partisë Socialiste me informacione për mbi 910,000 votues të survejuar nga një sistem patronazhistësh e kontrolli që të kujton “periudhën e komunizmit”.
“Shqipëria me sa dukur është nëmur që çdo politikan i suksesshëm të shndërrohet brenda një kohe të shkurtër në një dhespot arrogant, thua se diktatori stalinist Enver Hoxha po kërkon vazhdimisht një formë të zbutur reinkarnacioni”. /DW
