Rreth 3 milionë e 600 mijë shqiptarë me të drejtë vote përcaktojnë sot Parlamentin dhe Qeverinë e re me zgjedhjet e përgjithshme parlamentare.
Në vend janë ngritur 5199 Qendra Votimi, ndërsa procesi nis në orën 07:00.
Kushtetuta dhe Kodi Zgjedhor përcakton se Shqipëria ka një sistem zgjedhor proporcional rajonal, ku në secilin prej 12 qarqeve të vendit prodhohen mandate, bazuar në popullsinë e secilit Qark.
Qarku Kukës është ai që nxjerr më pak deputetë, vetëm 3. Ndërkohë që nga Tirana, e cila ka dhe numrin më të madh të popullsisë në vend, përftohen 36 mandate ligjvënësish.
Në këto zgjedhje parlamentare, do të garojnë 1841 kandidatë për deputetë, që përfaqësojnë 12 parti, koalicione zgjedhore e kandidatë të pavarur.
Në të njëjtën Fletë Votimi Zgjedhësit do të duhet të votojë për partinë dhe kandidatin preferencial për deputet, që në Fletën e Votimit do të identifikohet nga një numër e jo emri i tij.
Ligji saktëson se së pari numërohen votat për subjektet zgjedhore e më pas, për kandidatët për deputetë. Lista fituese e kandidatëve për deputetë pas numërimit të votave për partitë, mund të thyhet vetëm nëse një kandidat që renditet poshtë vijës së kuqe ka marrë më shumë preferenca se mesatarja e votave të partisë.
Zgjedhjet do të monitorohen nga mbi 500 vëzhgues vendas dhe të huaj, ndërsa vëmendja kryesore pritet të jetë në Tiranë, Durrës, Elbasan, Shkodër e Vlorë.
Për herë të parë në këto zgjedhje aplikohet edhe teknologjia në identifikimin e votuesve, ndërsa numërimi elektronik do të aplikohet në njësinë nr 10 në Tiranë, ku retultati pritet të shpallet në orën 08:00 të së hënës.
