Nga BoldNews.al
Komisioni i Pavarur i Kualifikimit shkarkon nga detyra prokurorin e Tiranës, Kolë Hysenaj, një prej anëtarëve të grupit hetimor që u munduan të pastronin imazhin e ish-ministrit të Brendshëm, Fatmir Xhafajt dhe vëllai të tij trafikant, Agron (Geron) Xhafaj.
Trupa e Vetingut konstatoi probleme të shumta të prokurorit Hysenaj në të tre kriteret e rivlerësimit-pasurinë, integritetin dhe aftësitë profesionale.
Madje, disa prej gjetjeve të Komisionit të Vetingut janë të një natyre penale, të atij niveli që mund ta vendosin tashmë ish-prokurorin, përballë kolegëve të tij në bankën e të akuzuarve.
Hysenaj ndoqi hetimet për çështjen “Geron” dhe kërkoi dënimin me burgim për personat që, sipas tij, “tentuan të prishnin imazhin e Fatmir Xhafaj”, nëpërmjet prononcimeve publike që e lidhnin vëllain e ish-ministrit të Brendshëm me aktivitetin kriminal të trafikut të narkotikëve, vepër për të cilën po vuan dënimin në Itali.
Para Hysenajt, trupa e Vetingut ka nxjerrë jashtë sistemit si të korruptuar edhe gjyqtarë e prokurorë të tjerë, të cilët u angazhuan maksimalisht për të mbrojtur Agron (Geron) Xhafaj dhe vëllain e tij, Fatmir Xhafajn.
Çështja “Geron” nisi fillimisht të hetohej në ish-Prokurorinë për Krime të Rënda dhe më pas kaloi në Prokurorinë dhe gjykatën e Tiranës.
Në këto ecejake, rasti ka kaluar në duar gjyqtarësh e prokurorësh të ndryshëm, të cilët shpresuan pa sukses në mbështetjen e Fatmir Xhafajt për të kaluar Vetingun.
Prokurorët
– Gentian Osmani, ish-prokuror i Krimeve të Rënda, udhëhoqi hetimet fillimisht, duke u angazhuar në tjetërsimin e provave dhe duke krijuar situata në favor të Agron (Geron) Xhafaj.
Pas këtij shërbimi, Osmani kaloi shkallën e parë të Vetingut, megjithë problemet e shumta në pasurinë e tij. Ai u promovua si anëtar i Këshillit të Lartë të Prokurorisë.
Por, u përball me Kolegjin e Posaçëm të Apelimit dhe u shkarkua nga detyra për pasuri të pajustifikuar.
– Përparim Kulluri, ish-prokuror i Krimeve të Rënda, ndoqi bashkë me Gentian Osmanin hetimet e çështjes “Geron”.
U shkarkua nga shkalla e parë e Vetingut për probleme me pasurinë. Vendimi i shkarkimit u konfirmua edhe nga Kolegji i Posaçëm i Apelimit.
– Donika Prela, ish-drejtuese e Krimeve të Rënda, udhëhoqi hetimet në favor të Fatmir Xhafajt në çështjen “Geron”.
Për këtë “shërbim politik”, si edhe për të tjera, ajo u konfirmua nga shkalla e parë e Vetingut.
Më tej, u shkarkua nga Kolegji i Posaçëm i Apelimit, për probleme të shumta me pasurinë.
– Artan Bajramaj, ish-prokurori i Apelit të Krimeve të Rënda, i cili mbështeti masat për “denoncuesit” e Agron (Geron) Xhafaj, u shkarkua në të dy shkallët e Vetingut për shkak të probleme me pasurinë.
Pasi çështja “Geron” kaloi për kompetencë në Prokurorinë e Tiranës, hetimi vijoi nga Kolë Hysenaj dhe Genc Qana.
– Kolë Hysenaj, i cili u promovua si zv.drejtues i Prokurorisë së Tiranës pas “shërbimit” në favor të Fatmir Xhafajt, u shkarkua këtë të Hënë, pas problemeve të shumta me pasurinë dhe figurën.
– Genc Qana, një tjetër prokuror që u ngrit në detyrë në hierarkinë e Prokurorinë e Tiranës pas çështjes “Geron”, u shkarkua pak javë më parë nga Komisioni i Pavarur i Kualifikimit.
Gjyqtarët
– Liljana Baku, ish-gjyqtare e Krimeve të Rënda, e cila vendosi masat e sigurimit për “denoncuesit” e Agron (Geron) Xhafaj, u detyrua të japë dorëheqjen nga detyra, pasi Komisioni i Pavarur i Kualifikimit i dërgoi relacionin negativ.
– Artan Gjermeni, gjyqtari i Tiranës, i cili shpalli fajtor “denoncuesit” e Agron (Geron) Xhafaj, pritet të përballet me procesin e Vetingut.
Megjithatë, të dhënat publike mbi pasurinë e tij krijojnë bindjen se ai thjesht është duke pritur vendimin e shkarkimit.
– Flutura Skënderi, gjyqtarja e Apelit të Tiranës, e cila ishte pjesë e trupës që la në fuqi masat e sigurimit për “denoncuesit” e Agron (Geron) Xhafaj, tashmë është e shkarkuar nga detyra, për shkak të problemeve me pasurinë.
– Artur Gaxhi, i cili mbështeti koleget e tij Skënderi për të caktuar masa sigurimi për “denoncuesit” e Agron (Geron) Xhafaj, është gjithashtu jashtë sistemit të drejtësisë, pasi Komisioni i Vetingut konstatoi probleme me pasurinë e tij.
