Qytetarja Jeta Asqeriu ka treguar se është infektuar disa ditë pasi mori dozën e parë të vaksinës anti Covid.
Ajo ka folur për “Breaking”, në Top News se nuk ka pasur asnjë shqetësim kur ka marrë vaksinën, ndërsa ka qenë e kujdeshme edhe pas marrjes së dozës.
“Bëra vaksinën kineze në 2 prill. Nuk pata asnjë shqetësim. Edhe tani nuk kam asnjë problem. U infektova 12 ditë pas marrjes së vaksinës, kontaktova menjëherë mjekun e familjes dhe bëra testin, dola pozitive”.
Zonja thotë se ka qenë e kujdesshme, edhe pasi mori vaksinën. “Para se të bëja vaksinën nuk kam pasur asnjë kontakt me persona të infektuar. Kam qenë shumë e kujdesshme”.
Laboranti mikrobiolog, Vasil Bashari shpjegon se duhet të jemi të kujdesshëm. “Nuk duhet ta ulim vigjilencën. Duhet patjetër të mbajmë maskat, të ruajmë distancat. Këtu, ka pasur disa raste infektimi pas marrjes së dozës së parë. Nuk do të thotë se virusi nuk të zë, por thjesht kanë simptoma më të lehta, e kalojnë shumë më lehtë. Vaksina ul pozitivitetin, efektet anësore dhe fatalitete. Sidomos pas dozës së parë, patjetër 10 ditëshin e parë, që organizmi të krijojë antitrupat”,- thotë ai.
