Vllaznia mori një fitore të artë 1-0 ndaj Laçit në gjysmëfinalen e Kupës së Shqipërisë. Shkodranët arritën të shkonin në finalen e Kupës pas 11 vitesh dhe do të tentojnë të fitojnë trofeun ndaj Skënderbeut. I ftuar në emisionin “Skaner”, sponsori Alban Xhaferi u shpreh se sot ka qenë një ditë e mrekullueshme, ndërsa përsa i përketë trajnerit nuk ka ende një konfirmim për sezonin e ri.
“Sot ka qenë një ditë e mrekullueshme sepse jemi afruar me objektivin që kemi. Është diçka e bukur për qytetin sepse këtë Vllazni po e shijojnë të gjithë. Besoj se ekipi është kthyer dhe do vazhdojmë edhe luftën për kampionat.
Ekipi është më i motivuar më shumë se asnjëherë tjetër. Unë mendoj se Vllaznia e ka kaluar atë krizën dhe jam besimplotë se ndeshje pas ndeshje duhet të marrim maksimumin. Duhet të bëjmë ndeshje të bukura dhe të arrijmë objektivat. Duhet të tregojmë se asgjë nuk ndodh rastësisht.
Ne në fillim kemi vendosur objektivat, që janë Kupat e Europës, por brenda kemi përfshirë edhe titullin. Në kampionat është plotësisht e mundur që të fitojmë. Humbja e Teutës kundër Skënderbeut tregon se asnjë skuadër nuk duhet nënvlerësuar, sidomos në fazën e katërt. Gara do jetë kush gabon më pak dhe shpresoj mos të gabojmë me këto skuadra. Trajneri për sezonin e ri? Është ende herë për të folur për këtë temë”,-u shpreh Xhaferri.
